22-сентябрдиз Ватандин ЧIехи дяведин, зегьметдин ва прокуратурадин ветеран Нежеф Примован 90 йис тамам хьана. Вичин уьмуьрдин 50-далайни виниз йисар ада республикада законлувал ва къанун-къайда мягькемаруниз бахшна.
Нежеф Примова прокуратурадин органра зегьметдин рехъ 1955-йисуз Ростовдин юриствилин школа яру дипломдалди акьалтIарайдалай кьулухъ башламишна. Ам райондин прокуратурадин силисчидилай ДАССР-дин прокурордин силис тухунин рекьяй заместителвилел кьван яргъал рехъ фена. 1989-йисан июлдилай 1998-йисан майдалди, гзаф йисара къуллугъ авуналди, лайихлу пенсиядиз экъечIдалди ада ДАССР-дин прокурордин правовой рекьяй ва СМИ-рихъни общественностдихъ галаз алакъаяр таъминардай рекьяй старший куьмекчи яз кIвалахна.
Прокуратурадин органра яргъал йисара кIвалахдайла, Нежеф Шерифовича вич виниз тир дережадин пешекар, истемишдай ва вичин принципрал кIеви регьбер, тешкиллувилин хъсан алакьунар авай инсан яз къалурна. Зегьметдал рикI хьуни, низамлувили адаз вичел ихтибарнавай вири участокра прокурорвилин гуьзчивал (надзор) агалкьунралди кьилиз акъудунин карда куьмекна. Къуллугъдин везифаяр чешнелудаказ кьилиз акъудунай Н.Примов ДАССР-дин прокурордин, РФ-дин прокурордин ва СССР-дин Генеральный прокурордин приказралди мукьвал-мукьвал гьевесламишдай. И шабагьрик адаз гайи классрин чинер, гьа гьисабдай яз юстициядин старший советниквилин (полковник) чинни ква.
“Прокурорвилин кIвалах кьиле тухузвай вири участокра Нежеф Шерифович кар чидай, авторитетлу, эдеблу ва кIусни дамах гвачир инсан яз, виридаз чешне тир. Республикадин машгьур прокуроррин — силисчийрин, чпин уьмуьр къуллугъдин везифаяр кьилиз акъудуниз бахш авур ксарин арада Нежеф Примова лайихлу чка кьазва. Ам хьтин инсанар чешне къачуниз лайихлу я. Пенсиядиз экъечIайлани, прокуратурадин ветеран кIвалахдин яцIа ама: ада агьалияр ихтияррин жигьетдай гъавурдик кутунин кIвалах активнидаказ тухузва, жегьил пешекаррив вичин девлетлу тежриба агакьарзава”, — лугьузва адакай РД-дин прокуратурадин ветеранрин Советда.
“Лезги газетдин” редакциядин коллективди Нежеф Шерифович Примоваз 90 йисан юбилей рикIин сидкьидай мубаракзава. Адахъ чандин сагъвал, вичин багърийрин къайгъударвиливни кIанивилив ацIанвай мадни яргъи уьмуьр хьун алхишзава. Куь хъсанвал, руьгьдин къуватлувал, пешедиз вафалувал чаз виридаз чешне я.
«Лезги газет»
