ООН-ди разивал къалурна
ООН-дин Генассамблеядин сессиядал рахадайла, Россиядин Президент В. Путина ООН-дин къуллугъчийриз коронавирусдин вакцина пулсуздаказ теклифна.
“ТАСС” чешмеди хабар гузвайвал, ООН-да Россиядин регьбердин теклиф жумартвилинди яз гьисабна ва чпин патай адаз чухсагъул малумарна. Къейдзавайвал, тешкилатдин медицинадин къуллугъди вакцина ахтармишун хиве кьунва.
База мягькемарна
США-дин терефди Сириядин Камышлы шегьердин турпагъриз бронетехника ва ракетайриз аксивалдай оборонадин (ПРО) система ракъурайдалай кьулухъ Россиядин кьушунрини а регионда авай база авайдалай мягькемар хъувуна. Идакай “Военный обозреватель” TeIegram-каналди хабар гана.
Америкадин терефди алава къуватар гележегда терроризмдихъ галаз женг тухун патал чарасуз яз гьисабзава. ПРО-дин системаяр гьавада къаравулвал авун патал кардик кутадайвал я, бронемашинри кьушунриз куьмек гуда.
Нубатдин куьмек
ТIугъвалдин шартIарихъ галаз алакъалу яз, Россияди Кеферпатан Кореядиз мад сеферда гуманитарный куьмек гана. КНДР-да авай Россиядин векилханади Facebook-да малумарайвал, нубатдин сеферда чи уьлкведи 50 агъзур тонндив агакьна къуьл ракъурна.
“Кореядин кьилевайбуру Россиядин гьукумдарриз ва халкьдиз стхавилелди куьмек гунай рикIин сидкьидай сагърай лугьузва. ТIугъвал себеб яз арадал атанвай муракаб гьалара ихьтин мергьяматлу крари чи уьлквейрин арада амадагвилин, дуствилин алакъаяр авайди тестикьарзава”, — кхьизва чешмеди.
Къейдзавайвал, Кеферпатан Кореядин хуьруьн майишатдин хилез къати гарарини еке зиянар гана.
31 миллиондилай алатнава
Дуьньяда коронавирус акатайбурун кьадар 31 миллиондилай артух хьанва. Д.Хопкинсан университетдин проектдин делилрал асаслу яз, 23-сентябрдиз санлай дуьньяда коронавирусди акIажарайбурун кьадар 31 606 979-дав агакьнава, 970 949 кас кьенва, 21 749 103 — сагъар хъувунва.
Россияда коронавирус себеб яз 1 122 241 кас начагъ хьана, 19 799 кас кьена, 923 699 сагъар хъувунва.
ТIугъвалди гзафни-гзаф США-да кьил хкажнава. Азар гзаф чукIунин жигьетдай кьвед лагьай чкадал — Индия, пуд лагьай чкадал Бразилия ала. Вирус акатнавай дуьшуьшар виридалайни гзаф дуьздал акъуднавай вад уьлкведин арада Россияни Перу ава.
ТIалабна кIанзава
ООН-да Украинадин гьамишан векил С.Кислицади къейднавайвал, Крымдиз яд гунин месэла гуьнгуьна хтун патал Россияди Украинадин гьукумдивай гьелягьар кьуналди ваъ, официальнидаказ тIалабуналди алахъунар авун герек я. Ихьтин фикир ада “Крым.Реалии” чешмедиз малумарна.
Ада алава хъувурвал, Россиядин терефди гьелелиг и месэладин патахъай рахунар кьиле тухуник кьил кутунвач. Идалай вилик са шумудра Украинадин гьукумдарри, эгер полуостров Киевдин гуьзчивилик кухтуртIа, гьа чIавуз яд ахъай хъувунин шартI малумарнай.
Крым Россиядик ахкатдалди, анаг целди Северо-Крымский къаналди таъминарзавай. 2014-йисуз Украинади и рекьер агална.
Ужузни я, хийирлуни
Швециядин духтур-пегьризчи К.Андерсонан фикирдалди, виридалайни ужуз, гьа са вахтунда менфятлу суьрсетрик чичIек, келем, газар, чугъундур ва пастернак акатзава. Адан гафар “Svenska DagbIadet” чешмеди раижнава.
Дувул емиш тир майвайрилай гъейри, пешекарди сагъ тварарин (техил) тIуьнни алава хъувун теклифзава. Амма хуквадин азарар авайбуру, духтурдин гафаралди, келем чигдаказ тIуьна виже къведач. Ада картуфдикай авай хийирни рикIелай ракъур тавун теклифзава.
Духтур-пегьризчи Н.Пугачевадин фикирдалди, яхун жез кIанзавайбуру мукьвал-мукьвал таза хъчар, себзеватар, келемар, афнияр ва чугъундурар тIуьн лазим я. Калорияр тIимил квай и суьрсетар менфятлу витаминралди ва микроэлементралди девлетлу я.
Дявейрал эхир эцигин
ООН-дин генеральный секретарь А.Гутерреша гьисабзавайвал, дуьньядин уьлквейри 100 йикъан къене дявеяр куьтягьунин макьсад вилик эцигун герек я. Адан фикир “Новости” РИА-ди раижна.
Ада рикIел хкайвал, идалай вилик, коронавирусдин тIугъвал себеб яз, яракьралди ийизвай дявейрал эхир эцигуниз эвер ганай. Гила 2020-йисан эхирдалди амайди 100 югъ я. “Къе за вири халкьарин вилик-кьилик квай векилриз дуьньяда 2020-йисан эхирдалди дявеяр акъвазарунин месэла кьилиз акъудун патал вири къуватар эцигуниз эвер гузва”, — лагьана ада.
Идалай вилик Гутерреша малумарайвал, коронавирусдин къизгъинвал артух жезва. Адан гафаралди, алай вахтунда глобальный хатасузвилин жигьетдай сад лагьай чкадал алай къурхулувал тIугъвал я.
«Лезги газет»
