Чи республикадиз уьлкведа коронавирусдиз акси яз акъуднавай дармандин сад лагьай партия — 42 доза агакьнава. РикIел хкин хьи, и дарман академик Гамалеян тIварунихъ галай эпидемиологиядин ва микробиологиядин Милли ахтармишунардай центрадин алимри акъуднавайди я.
РД-дин здравоохраненидин министрдин гафаралди, дарман медицинадин работникриз рапар ягъун патал ишлемишда, гьикI лагьайтIа, абур хаталувилин дестеда ава. “Рапар ягъуни медицинадин работникар цIийи коронавирусдикай хуьн артухарда ва чIуру нетижаяр арадал атунин вилик пад кьаз куьмекда, гьикI лагьайтIа и раб ягъайбуру азардиз акси антителаяр азарлу хьайибурулай хейлин фад арадал гъида”, — гъавурда туна Жамалудин Гьажиибрагьимова.
Мукьвара дарман мадни агакьарун гуьзлемишзава. “Ам и мукьвара арадал гъанвайди я, адан кьадар гьелелиг тIимил я. Сифте нубатда чна рапар чарасуз герек ксариз яда”, — къейдна ведомстводин кьили.
Лагьана кIанда хьи, рапар анжах хуш авайбуруз яда. Медицинадин работникрин арада сифтегьан гуьгьуьллубур ава. Абурукай сад садакай масадак акатдай азаррин Республикадин центрадин духтур-инфекционист Абдулхаликь Алиев: “Зи кIвалах тайин хаталувилерихъ галаз алакъалуди я, гьикI хьи, зун мукьвал-мукьвал яру зонада жезва ва COVID-19-дикни азарлу хьанвач, гьавиляй за раб яда, иллаки хаталувилин зонада авайбур азар галукьуникай хуьда”.
Идалайни гъейри, больницадин пешекарри дарман хуьнин ва ам санай масаниз тухудайла, чарасуз тир къайдайрин инструкцияни къачуна. ИкI, медицинадин идарайра ва вакцина санай масаниз тухун патал ишлемишзавай улакьар холодильникар хьун лазим я, абурани мекьивал 18 градусдилай агъуз хьун лазим туш. Гьавиляй COVID-19-дикай хуьн патал региондин здравоохраненидин министерстводи 60 морозильник маса къачунва. Абур медицинадин 50 идарадиз пайнава, гьа гьисабдай яз 6 садакай масадак акатдай азаррин Республикадин центрада эцигнава.
«Лезги газет»
