Алай йисан 22-сентябрдиз РД-дин Кьил Владимир Васильева Махачкъаладин международный аэропортуна Россиядин Силисдин комитетдин председатель Александр Бастрыкин кьабулна ва абурун арада гуьруьш кьиле фена.
Гуьруьшдал регионда, законсуз гьерекатриз аксивал ийидайла, саналди тир серенжемар тухуниз, республикадин итижар ва агьалийрин законлу ихтиярар хуьниз ва гьакI экономикадин рекьяй хатасузвал таъминаруниз талукь важиблу са шумуд месэла веревирдна.
Силисдин комитетди ФСБ-дихъ ва полициядихъ галаз санал Кеферпатан Кавказдин регионда криминогенный гьалар хъсанарун патал кIвалах давамарда. Идан гьакъиндай, Владимир Васильевахъ галаз кьиле фейи гуьруьшдин нетижа хьиз, РФ-дин Силисдин комитетдин сайтда хабар гузва.
“Председателди къейд авурвал, Россиядин ФСБ-дин ва МВД-дин подразделенийрихъ галаз санал кьиле тухвай серенжемри Кеферпатан Кавказдин регионда криминалдин гьерекатар тIимилардай нетижадал гъана. И рекьяй кIвалахар мадни активнидаказ давамарда”,- хабар гузва СК-ди.
Коррупциядихъ, экономикадихъ, террориствилихъ, къайдаяр хуьдай органрин работникрин уьмуьр хаталувилик кутунихъ галаз алакъалу тахсиркарвилер авур Дагъустандин виликан хейлин чиновникар уголовный жавабдарвилиз чIугунва. “Республикада тахсиркарвилерихъ галаз женг чIугунин карда виле акьадай хьтин кIвалах тешкилунай Бастрыкина республикадин Кьилиз сагърай лагьана ва регионда криминалдин гьерекатар мадни тIимиларун патал герек вири серенжемар кьабулдайдахъ инанмишарна”, — хабар гузва ведомстводин сайтди.
Гуьруьшдин вахтунда Бастрыкина ва Васильева республикада экономикадин жигьетдай хатасузвилин гьалар арадал гъун патал коррупциядиз акси яз тухузвай кIвалахдин нетижаяр кьуна ва хъийидай крарни веревирдна.
«Лезги газет»
