Къадим Дербентда шииратдал рикI алайбур, чпин алакьунар ахтармишзавайбурни гзаф ава. Мухбир ва шаир Гьажиагъа Мегьамедшерифова кьил кутуналди, ина “Ильф ва Петров” тIвар алай шииратдин клуб арадал гъанва.
Мукьвал-мукьвал жезвай мярекатрал клубдин активистри чпин шиирар кIелзава, сада-садаз фикирар лугьузва, къиметлу меслятар къалурзава.
Къейдна кIанда хьи, “Ильф ва Петров” клубдин иштиракчияр асул гьисабдай чпин эсерар урус чIалал теснифзавайбур я. Чеб шегьерда ва Дербентдин ракьун рекьин карханайра жуьреба-жуьре пешейрин иесияр тир Раиса Мачулкинадин, Натали Ниятан, Зейнаб Султанмегьамедовадин, Пейсах Мишиеван, Мирзебег Гьасанован, Адиширин Ялахъвидин ва са жерге маса авторрин шиирар мукьвал-мукьвал “Дербентдин хабарар” ва ракьун рекьин “Семафор” газетра чапзава.
“Ильф ва Петров” клубдин тешкилатчи Гьажиагъа Мегьамедшерифов шииратдинни публицистикадин са шумуд кIватIалдин автор я.
Нариман Къарибов
