15-сентябрдиз са акьван яргъал чIугун тавур азардилай гуьгъуьниз Россиядин лайихлу тренер Эседуллагь Азизович Шагьмарданов кечмиш хьана.
Са шумуд югъ идалай вилик Эседуллагь Азизович вичин хайи хуьруьз — Ахцегьиз мехъерик хъфенвай. Анай Махачкъаладиз хтайла, адан гьал пис хьана азарханада къаткурна. Адак коронавирус азар ква лагьана. Сагъ хъжезвай хьтиндини тир, амма залум азарди яшлу касдиз инсафнач. Идан гьакъиндай чи газетдиз Дагъустандин кьуршахар кьунай Федерациядин пресс-къуллугъди хабар гана.
Тренервилин цехдин агъсакъалди алатай йисуз вичин 70 йисан юбилей къейднай. Яшаризни килиг тавуна, ада активный уьмуьр тухузвай, акъажунриз физвай, Дагъустандин госуниверситетда кIвалахун давамарзавай. Ина ада физкультурадин тарсар ва азаддиз кьуршахар кьунай секциядиз регьбервал гузвай.
Дагпединститутдин физкультурадин факультет куьтягьайдалай гуьгъуьниз, СССР-дин спортдин мастер яз, ада вичин уьмуьр 40 йисалай гзаф вахтунда тренервилин пешедиз бахшна. Машгьур Али Алиевахъ галаз “Урожай” спортобществода кIвалахдайла, ада Дагъустандин, Россиядин ва СССР-дин хкянавай командайрин составда аваз хьайи вини дережадин хейлин пагьливанар тербияламишна.
Эседуллагь Азизович Кьиблепатан Америкадани хъсандиз чида, адан гьакъиндай хъсан гафар лугьузва. Ада Колумбияда олимпиададин пуд циклда кIвалахна, гъалибчияр ва Панамерикадин къугъунрин ва чемпионатрин призерар гьазурна, адан тербиячи Жаклин Рентерияди Олимпиададин къугъунра кьве сеферда буьруьнждин медалар къазанмишна.
Ада Доминиканский республикада ва Перудани кIвалахна. Эхиримжи вахтаралди ада Латиндин Америкадай тир вичин амадагриз ва кьуршахар кьадай пагьливанриз куьмекар гана, абурухъ галаз вичин тежриба ва чирвилер пайна. Абур Эседуллагь Азизовичан патав Махачкъаладиз атанай, адан гуьзчивилик кваз сборар тухванай ва акъажунра иштиракнай.
Эседуллагь Шагьмарданова вакъиайрив ацIанвай уьмуьр кечирмишна. Ада республикада азаддиз кьуршахар кьун вилик фин патал хейлин зегьметар чIугуна. Ам вичин пешедиз вафалу тренер тир. Эседуллагь Азизович чи рикIера авторитетлу пешекар, чарадан дердиникай хабар кьадай кас хьиз гьамишалугъ яз амукьда.
«Лезги газет»
