Сергей Алимович Меликован — 55 йис
“Патриот” гафуниз Мегьамед Гьажиеван словарда ихьтин баян ганва: “Вичин Ватан ва халкь кIандайди, абуруз вафалуди”. Гьакъикъатдани, Ватандиз, халкьдиз вафалу хьун — им гьар са кас патал еке бахт я. Ихьтин инсанар лезги халкьдихъ гзаф ава. Абурукай сад Россиядин государственный ва военный деятель, генерал-полковник Сергей Алимович Меликов я.
Ери-бине Кьасумхуьрелай тир Меликоврин тухумдин тIвар Россиядин къенепатан крарин министерстводиз талукь къурулушра гзафбуруз хъсандиз таниш я. Меликоврин тухумдикай сифте яз 2-рангдин техник-интендантвилин (ам гилан лейтенантвилин чиндиз барабар я) чин къачурди Нур-Мегьамед Балович Меликов я. Адан хва Алим бубадин рекьеваз фена: ам СССР-дин МВД-дин къенепатан кьушунра курсантвилелай кьилдин бригададин командирвилел кьван хкаж хьана. Отставкада авай полковник Алим Меликов 2012-йисан 29-апрелдиз 80 йисан яшда аваз рагьметдиз фена.
ЧIехи бубайрин крар Сергей Алимович Меликова уьзягъдаказ, баркалла алаз давамарна.
Сергей Меликов 1965-йисан 12-сентябрдиз Орехово-Зуево шегьерда дидедиз хьана. 1986-йисуз ада Саратовдин Ф.Э.Дзержинскийдин тIварунихъ галай къенепатан кьушунрин высший командный училище акьалтIарна. 1986-йисалай 1991-йисалди Украинада ва Молдавияда СССР-дин МВД-дин къенепатан кьушунрин Управленида кьилдин бригадада къуллугъна.
1994-йисуз С.Меликова М.В.Фрунзедин тIварунихъ галай Военный академиядин пограничный ва къенепатан кьушунрин факультет акьалтIарна. Ам Россиядин МВД-дин къенепатан кьушунрин Кеферпатан Кавказдин округдиз ракъурна. Ада начальникдин старший куьмекчивилин, оперативный назначенидин дивизиядин батальондин командирдин везифаяр тамамарна. Чечняда кьиле фейи женгинин гьерекатра иштиракна. Чечняда разведкада къуллугъдайла, женгинин са шумуд операция хъсандиз кьиле тухунай ам “Военный лайихлувилерай” ордендиз лайихлу хьана. 1996-йисан мартдиз са операцияда С.Меликова гьалкъада гьатнавай ОМОН-дин аскерар азад хъийиз куьмекна. И кьегьалвиляй ам махсус метлеб авай 7-отряддин командир, полковник Игор Семинан гъиляй краповый берет къачуниз лайихлу хьана. Им, уьмуьр хаталувилик кутуна., викIегьвал къалурунай женгинин юлдашар къутармишунай тек-туьк гузвай шабагь я.
1997-йисуз С.Меликов Россиядин МВД-дин къенепатан кьушунрин оперативный метлеб авай кьилдин дивизиядин 2-полкунин командирдин заместителвиле, 1998-йисуз и полкунин командирвиле тайинарна. 2001-йисуз адакай дивизиядин командирдин заместитель, 2002-йисан июндиз дивизиядин командир хьана.
2008-йисан апрелдин вацра С.Меликов Россиядин МВД-дин къенепатан кьушунрин Центральный региондин командованидин кьушунрин командующийдин сад лагьай заместителвиле — штабдин начальниквиле тайинарна. 2011-йисуз ада Россиядин Федерациядин Яракьлу Къуватрин Генеральный штабдин Военный академия акьалтIарна, гьа йисан сентябрдиз ам Кеферпатан Кавказдин территорияда терроризмдиз акси операция тухунин рекьяй сад авунвай кьушунрин командующийвиле — Россиядин МВД-дин къенепатан кьушунрин Кеферпатан Кавказдин командованидин кьушунрин командующийдин сад лагьай заместителвиле тайинарна.
2014-йисуз Сергей Алимовичакай РФ-дин МВД-дин къенепатан кьушунрин кьилин штабдин начальник хьана. Гьа и йисуз ам Кеферпатан Кавказдин Федеральный округда Россиядин Федерациядин Президентдин патай тамам ихтиярар авай Векилдин къуллугъдал тайинарна. Гьа са вахтунда Сергей Алимович РФ-дин Хатасузвилин Советдикни кутуна. С.Меликоваз Россиядин 1-классдин Государственный Советникдин чин гана.
2016-йисан июндиз ам Россиядин Федерациядин Милли гвардиядин кьушунрин директордин сад лагьай заместителвиле — РФ-дин Милли гвардиядин главнокомандующийвиле тайинарна. 2019-йисуз Сергей Меликов отставкадиз экъечIна. Адахъ “Орден Почета” ва “Женгинин лайихлувилерай” орденар ава.
Сергей Меликовакай рахадайла, ихьтин са карни къейд ийиз кIанзава. М.В. Фрунзедин тIварунихъ галай Военный академияда кIелдайла, Сергей Алимович урус дишегьли Галинадихъ галаз таниш хьана, абуру чпин рикIер, сирер сад авуна. Галинадиз сифте гъуьлуьк хьайи гада Дмитрий Серков Сергей Алимовича хвавиле кьабулна, адаз хъсан тербия гана. Дмитрия Санкт-Петербургдин къенепатан кьушунрин военный институт акьалтIарна, махсус метлебдин подразделенийра, гьабурукай яз С.А.Меликова команда гузвай “Витязь” дивизияда къуллугъна.
Штурмовой группадин командир яз, Д.Серкова женгинин гзаф кьадар серенжемра иштиракна, дирибашвилер къалурна. Адахъ Суворован медаль авай. Дагъустандал международный бандитри гьужум авурла, Дмитрий Серкова вич аниз ракъурунин патахъай рапорт кхьена. Гьелбетда, генерал-лейтенант, дивизиядин командир тир Сергей Меликовавай вичин гада къизгъинвал авай чкадиз ракъур тавунайтIани жезвай. Амма халис офицер, ватанперес и кардив вичин рикIин буйругъдалди эгечIна. “Эгер чна гьарда вичин хва-стха, багърияр хаталу чкайривай къерех ийиз хьайитIа, бандитрин, террористрин вилик пад ни кьада, ислягь халкьдин тереф ни хуьда?” — фикирнай Сергей Алимовича.
Къарабудахкент хуьруьн патав гвай тама бандитрихъ галаз кьиле фейи барабарсуз са женгина Д.Серков игитвилелди телеф хьана. И чIулав хабар Сергей Меликовав телефондай адан женгинин дуст Сергей Ченчика агакьарна.
2007-йисан 11-декабрдиз РФ-дин Президентдин Указдалди Дмитрий Серковаз Россиядин Игитвилин тIвар гана. Россияда МВД-дин къенепатан кьушунрин Главнокомандующий, армиядин генерал Николай Рогожина Игитвилин Яру гъед Дмитриян диде, медицинадин къуллугъдин лейтенант Галина Анатольевна Меликовадив вахкана.
Хазран Кьасумов
