Алай йисан 5-сентябрдиз Докъузпара райондин Къурушрин хуьруьз мукьва дагъдин мулкара бедбахтвилин дуьшуьш арадал атана: 40 йис хьанвай итим дагьардиз аватна.
И йикъан экуьнин сятдин 10-даз 25 декьикьа кIвалахайла, Россиядин МЧС-дин Дагъустанда авай Кьилин Управленидив дагълара дагьардиз итим аватнавайдакай хабар агакьна. И дуьшуьш Къурушрин хуьруьн кьулухъ Азербайжандихъ галаз авай часпардиз мукьва застава авай чкада арадал атана. Гьасятда иниз Ахцегь, Мегьарамдхуьруьн, Дербент районрин ПСС-дин къуллугъчияр (хата-баладик акатайбур къутармишдайбур) рекье гьатна.
Малум хьайивал, дагьардиз аватнавайди Акуша райондин Балхар хуьруьн агьали Мегьамед Абакаров тир. Вирида Мегьамед аламатдин жуьреда къутармишиз жеда, адал чан аламукьда лагьана фикирзавай. Гьайиф хьи, и умудар кьилиз акъатнач. Хьайи тIарвилерикди ам телеф хьана.
ТIебиатдин мишекъат шартIар себеб яз, вертолетдин куьмекдалди мейит дагьардай ахкъудиз хьанач. И кардал МЧС-дин къуллугъчияр желбнавайтIани, мейит ахкъудиз куьмек гуз къурушвияр атана. Абурун алахъунар себеб яз, са кьадар вахт арадай фейила, Мегьамед Абакарован мейит винел ахкъудна, кучукун патал хайи хуьруьз рекье хтуна.
КIеве гьатай чIавуз сада-садаз куьмек гун, дустуни дустунин гъил кьун Дагъустандин чилел фадлай деб хьанва. И адетар къурушвийрини давамарзава. Рагьметлу Мегьамед Абакарован дахди, стхайри, вахари, Балхар хуьруьн жемятди куьмек гунай къурушвийриз сагърай лугьузва ва “Лезги газетдин” чинал абурун тIварар гъизва.
Тегъи Баширов, Ризван Баширов, Ариф Сеферов, Тевекил Сулейманов, Тимур Рустамов, Алимегьамед Рустамов, Эрзиман Къулиев, Тамерлан Къулиев, Абил Эскеров, Аким Эскеров, Къагьриман Эскеров, Давут Булуев, Мирзе Кишиев, Мамед Рамазанов, Дагълар Жамалов, Къунагъ Къулиев, Сагьиб Гьажиев.
Къуй чпелай Аллагь рази хьурай!
«Лезги газет»
