Урусатдин агьалийриз федеральный кьезилвилерикай (льготрикай) менфят къачудай мумкинвал гьар йисуз гузва. И кардихъ галаз алакъалу яз, агьалийри 1-октябрдалди МФЦ-диз, Пенсийрин фондундин (ОПФ) муьштерияр кьабулдай къуллугъдиз, виликамаз нубат кьуна ва я тахьайтIа, интернетдин куьмекдалди (ОПФ-дин сайтда авай агьалидин хсуси кабинетда ва я “Госкъуллугъар” порталда) талукь арза кхьена кIанзава.
Яшайишдин рекьяй кардик квай къуллугъар (набор социальных услуг) хкягъун патал 1-октябрдалди арзаяр агакьарнавай агьалийривай 2021-йисан 1-январдилай кьезилвилерикай хийир къачуз жеда.
Къейд ийин хьи, Урусатда федеральный кьезилвилерикай агъадихъ къалурнавай агьалийрин категорийривай менфят къачуз жеда:
— дяведин гьерекатрин ветеранривай;
— Ватандин ЧIехи дяведин иштиракчийривайни набутривай;
— рагьметдиз фенвай дяведин гьерекатрин ветеранрин ва дяведин иштиракчийрин хизанрай тирбурувай;
— Чернобылдин авариядин нетижаяр арадай акъудайбурувай;
— набутривай, гьа жергедай яз набут аялривайни.
Абуруз государстводи яшайишдин рекьяй гузвай кьезилвилерик ихьтинбур акатзава:
— дарманар;
— медицинадин затIар (мисал яз, протезар, набутрин коляска ва мсб.);
— сагъламвал мягькемарун патал санаторийриз, курортриз путевкаяр;
— сагъар хъийизвай чкадиз улакьда аваз пулсуздаказ фин.
Къейд ийин хьи, алай йисуз яшайишдин рекьяй кардик квай къуллугърин (набор социальных услуг) къимет 1155,06 манатдиз барабар я. И такьатрикай 889,66 манат дарманралди таъминаруниз, 137,63 манат санаторийра, курортра сагъламвал мягькемаруниз, 127,77 манат сагъар хъийизвай чкадиз пулсуздаказ фин патал чара ийизва.
Яшайишдин рекьяй кардик квай къуллугърикай менфят къачудай ихтияр авай агьалийриз къуллугърин чкадал пул къачудай мумкинвални ава.
«Лезги газет»
