Сечкияр
Алай йисан 13-сентябрдиз Россиядин Федерациядин 83 регионда, гьа гьисабдай яз Дагъустан Республикадани сечкийрин серенжемар кьиле фена. Дагъларин уьлкведин Буйнакск, Дагъустандин Огни, Каспийск, Къизляр, Южный Сухокумск, Махачкъала шегьерра ва муниципальный 38 районда сечкийрин муниципальный 601 кампания кьиле тухвана.
Виликамаз кьунвай нетижайрай аквазвайвал, районрин ва шегьеррин собранийриз депутатар хкязавай сечкийра 71,30 процент сечкичийри иштиракна. Виридалайни активнидаказ Дагъустандин Огни, Буйнакск шегьеррин ва Хасавюрт, Къули, Сулейман-Стальский районрин сечкичийри сесер гана.
Сечкийрин сад лагьай юкъуз (11-сентябрь) сечкидин участокриз 15,55 ва 12-сентябрдиз 39,51 процент сечкичияр атана.
Лугьун лазим я хьи, коронавирусдин тIугъвалдикай хуьн патал сечкийрин участокра Роспотребнадзорди истемишзавай вири серенжемрал амална. Участокар бес кьадарда маскайралди, бегьлейралди, антисептикрин такьатралди таъминарнавай.
Республикадин сечкидин комиссияди малумарайвал, сечкияр пуд юкъузни секин гьалара кьиле фена. Санлай къачурла, сечкийрин нетижайриз манийвалдай татугайвилериз рехъ ганач.
«Лезги газет»
