Мукьвара Москвада, Ирина Винер-Усмановадин тIварунихъ галай гимнастикадин дворецда, машгьур тренер Абдулманап Нурмегьамедован экуь къаматдиз бахшнавай турнир (адан къамат рикIел хуьнин лишан яз алай йисан ноябрдиз Дагъустанда женгинин самбодайни турнир кьиле тухун планрик ква) кьиле фена. Ана чи ватандаш, вичин ери-бине Мегьарамдхуьруьн райондин Хуьрелрин хуьряй тир Мугьаммед Эминова — Fight Nights Global международный организациядин (какахьай единоборствойрай, гьа гьисабдай яз ММА-дайни бягьсер кьиле тухунал машгъул тир) лигадин чемпионди — ярумчух кьезил заланвиляй чемпионвилин чIул еке устадвилелди хвена.
ИкI, 65,8 кг-дал къведалди заланвал авайбурун арада чи ватандаш Къазахстандай тир Муратбег Касымбаяхъ галаз бягьсиниз экъечIун — чпин устадвал къалурун, къуватар алцумун лазим тир. 5 раунддикай ибарат тир и бягьсина (судьяйри вирида сад хьтин къарар кьабулуналди) 23 йисан яшда авай чи ватандашди гъалибвал къазанмишна.
РикIел хкин: Fight Nights Global международный организациядин чемпионвилин тIвар сифте яз Мугьаммед Эминова Екатеринбургда аскеррин-десантникрин игитвилин 20 йисаз талукьарнавай, “Шагнувшие в бессмертие” тIвар ганвай спортдинни ватанпересвилин фестивалда къазанмишнай.
Чемпионвилин тIвар Мугьаммед Эминоваз Мегьарамдхуьруьн райондин кьил Фарид Агьмедовани тебрикна. Идакай райондин сайтда хабар ганва.
— Гьар са спортсмен Ватандал рикI алай кас хьун лазим я! Хайи макандин тIвар машгьурун патал вуна къазанмишзавай гъалибвилер акьалтзавай несилдиз чешне хьурай! Вахъ мадни еке агалкьунар, спортдин мадни кьакьан кукIушар муьтIуьгъардай къуватар хьун чи мурад я, — къейднава тебрикдин Чарче ада.
Рагнеда Рамалданова
