Махачкъалада, 320 миллион манатдин инвестицияр желб авуналди, кIвачин къапарин чIехи фабрика эцигунив эгечIнава. Ана кIвалахдин цIийи 330-дав агакьна чкаяр тешкилдайвал я. Идан гьакъиндай журналистриз региондин промышленностдин ва алишверишдин министерстводин пресс-къуллугъди хабар гана.
“Дагъустанда карханадин эцигунар кIвачин къапарин гьеле авазвай SERG производстводин бинедаллаз гъиле кьуна. Алай аямдин кIвачин къапар гьазурдай цIийи карханадин бинеяр кутунин мярекатда Дагъустандин промышленностдин ва алишверишдин министр Батыр Эмеева иштиракна. Гьеле кардик квай производствода гьасилзавай продукциядин кьадар артухаруни кIвалахдин цIийи 330 чка тешкилдай мумкинвал гуник умуд кутунва”, — суьгьбетна пресс-къуллугъдин векилди.
Компаниядихъ Махачкъаладин са промышленный зонада чилин кьве участок ава. 3300 квадратный метрдин майдан алай мулкунал кьве мертебадин кьве дарамат хкажда. Проектдиз желб ийизвай инвестицийрин кьадар 120 миллион манатдив агакьда. Кархана кардик акатайла, кIвалахдин цIийи 150-дав агакьна чкаяр тешкилдай мумкинвал жеда. Региондихъ ахьтин чкайрин патахъай алай вахтунда иллаки еке игьтияж ава.
Идалайни гъейри, министерстводин чалишмишвилералди производстводин пуд мертебадин дарамат эцигунин проект кьилиз акъудунин кIвалах гъиле хкьунва. А эцигунар, са жерге себебар аваз, пуд йис идалай вилик акъвазарайди тир. Къейдзавайвал, алай вахтунда эцигунардай ихтияр къачун патал талукь документар гьазурзава. И проектдал асаслу яз, 4500 квадратный метрдин майдан алай карханадин дарамат хкажун, ана кIвалахдин 180 цIийи чка тешкилун фикирдиз къачунва. Проект кьилиз акъудун патал чара ийидай инвестицийрин кьадар 200 миллион манатдив агакьда.
“Алай вахтунда эцигзавай карханадик еке умудар кутунва. Компаниядихъ гьазурзавай кIвачин къапарин кьадар йиса 600 агъзур жуьтуьнив агакьардай фикир ава. Санлай къачурла, Дагъустандин кIвачин къапар гьасилдай хилез неинки СКФО-да, гьакI санлай вири уьлкведани кIвенкIвечи чкайрал экъечIдай ниятар ава”, — малумарна РД-дин промышленностдин ва алишверишдин министерстводин пресс-къуллугъдин векилди.
«Лезги газет»
