Ирандай тир профессор Реза Малек-заде онкологиядин хиле машгьур духтуррикай сад яз гьисабзавай. Са сеферда ам маса шегьерда медицинадин рекьяй кьиле физвай илимдин конференциядиз гьазур жезвай. Профессор анал вичин доклад гваз рахана кIанзавай. Адак къалабулух квай, гьикI лагьайтIа, конференциядал адан хейлин йисарин илимдин кIвалахриз къимет гудайвал тир…
Ам рекье гьатна. Цавуз лув гайидалай кьулухъ кьве сят арадай фейила, технический рекьяй са гьихьтин ятIани месэлаяр арадал атун себеб яз, алим авай самолет тади гьалара мукьвал тир аэропортуна ацукьна. Реза Малек-задедиз конферециядиз геж жез кичIезвай, гьавиляй ада рехъ кирида кьунвай улакьда (машинда) аваз давамарна. Са кьадар вахт алатайла, гьава садлагьана дегиш хьана. Гар, марф, са гафуналди, тIурфан акъатна. Нетижада ам рекьелай алатна. Профессордиз гишин хьанвай, ада вич галат хьанвайда хьиз гьиссзавай. Ам акъваздай, ял ядай, фу недай чкадихъ къекъвезвай. Эхирни адал са къазмадиз ухшар кIвал гьалтна. Маса умуд амачир алимди и кIвалин рак гатана.
Кьилел шал алай са гуьрчег дишегьлиди адаз рак ахъайна. Профессорди вичин кьилел атанвай агьвалатдикай ихтилатна ва вичив телефон вугун тIалабна. Дишегьлиди вичихъ телефон авачирдакай хабарна ва гьава ачух жедалди кIвале амукьун теклифна. Духтурни рази хьана. Мугьмандин вилик чими хуьрек, чай эцигна. Са арадилай кIвалин иеси дишегьлиди мугьмандиз вичи капI авуна кIанзавайди лагьана ва адазни капI авун теклифна. Амма духтурди вич анжах зегьметдихъ агъазвайди я лагьана, капI авуникай кьил къакъудна.
Ада, столдихъ ацукьна, чай хъваз, шемерин ишигъдал кьепIинин патав яргъалди дуьаяр ийиз, явашдиз шехьзавай дишегьлидал гуьзчивалзавай. Духтур дишегьлидиз куьмек кIанзавайдан гъавурда гьасятда акьуна. Дуьаяр авуна куьтягьайдалай кьулухъ ада кIвалин иесидивай хабар кьуна:
— Вуна Аллагьдивай вуч тIалабзава? Аллагьдиз са мус ятIани ви дуьайрин ван жеда лагьана фикирзавани вуна? КьепIина авай аял гада яни, руш яни? Адан шумуд йис хьанва?
Дишегьли сефилдиз хъуьрена, кIевиз шехьиз гатIунна. Вилин накъвар михьи ийиз, ада духтурдиз жаваб гана:
— КьепIина авайди зи хва я. Ам тек-туьк гьалтдай ракдин азардик начагъзава. Тухвай духтурханайра санани адаз куьмекиз хьанач. Тек са духтурдивай зи хциз куьмекиз жеда. Адан тIвар Реза Малек-заде я. Ам шегьерда яшамиш жезва, амма, гьайиф хьи, захъ аял а духтурдин патав тухудай пул авач. Аллагьди гьелелиг зи дуьайриз жаваб ганвач. ЯтIани зун и карда Аллагьди заз куьмек гудайдахъ инанмиш я.
Духтур къах хьана амукьна. Адавай сивяй гаф акъудиз жезмачир. Зурзун акатна, адан вилерални накъвар атана. Ада вичи вичик “Аллагьу Акбар” лагьана, вичин кьилел атай дуьшуьшар рикIел хкана: тади гьалара ацукьай самолет, тIурфан, рехъ алатун…
Ам вири и крар арадал атун Аллагьди и кесиб дишегьлидин дуьайриз жаваб гунихъ галаз алакъалу тирдан гъавурда акьуна. Гьа са вахтунда духтурди Аллагьди вичизни, и дуьньядин вири крар туна, кпIунилайни дуьадилай гъейри мад затIни авачир кесибриз куьмек гудай мумкинвал ганвайди кьатIузвай…
Садазни пака кьилел вуч къведатIа чизвач. Гьавиляй гьамиша Аллагьдик умуд кутур, адавай тIалаба, дуьаяр ая. Аллагьдин тIвар, иман рикIе хуьх, куь уьмуьр лайихлудаказ кьиле фида.
(Макъалада ихтилат фенвай вакъиа къундарма туш).
Гьазурайди — Агьмед Магьмудов
