Чи ватанэгьлияр — гьар сана
Карина Азизова. Алакьунар авай и лезги рушан тIвар чи халкьдин арада са акьван машгьур туш. И кардин себебни ам я хьи, Карина Ашхабад шегьерда дидедиз хьана. Ина мектеб акьалтIарна, Москвада, Санкт-Петербургда, къецепатан уьлквейра музыкадин рекьяй чирвилер къачуна. Аял чIавалай вичин рикI алай пеше хкягъай руша США-да, Италияда, Испанияда, Европадин маса уьлквейра кьиле фейи концертра вишералди тамашачияр гьейранарзава. Алай вахтунда ам Испаниядин меркезда яшамиш жезва.
Карина Азизова вичин тIвар дуьньядин хейлин уьлквейра машгьур пианистка я. Адан ери-бине Азербайжанда авай лезгияр яшамиш жезвай Къалажух хуьряй я. Кьадар-кьисметди рушан хизан Туьркмениядиз акъудна. Амма хайи чилин къадир авай диде-бубади бубайрин Ватандихъ галаз авай алакъаяр атIанач, гьар йисуз, багърийрал кьил чIугваз, хуьруьз хквезва. Чпин веледризни абуру лезги чIал, милли адетар чирнава.
Ашхабадда музыкадин рекьяй алакьунар авай аялар патал ахъайнавай мектебда кIелайдалай кьулухъ 12 йис хьанвай Карина чкадин муаллимрин теклифдалди, чирвилер къачуз, Москвадиз физва. Ина ам П.И.Чайковскийдин тIварунихъ галай государстводин консерваториядин патав гвай музыкадин кьилин школадиз гьахьзава. Каринади са шумуд йис вилик ФЛНКА-дин сайт патал ганвай интервьюда къейдзава: “Зи алакьунриз къимет гайи диде-буба сагърай. Абуру, кичIени тахьана, бегьем яшарни тамам тахьанвай зун Москвадиз кIелиз ракъурна. Гьа вахтара мусурманрин хизандай руш велед, адет яз, текдиз яргъал шегьерриз ахъайзавайди тушир. Амма зи диде-бубади, зак квай ашкъи, музыкадихъ авай кIанивал акурла, Москвадиз ракъурдай къарар кьабулна. И кар авуналди абур кIусни гъалатI хьанач…”.
Гьакъикъатдани, эгер а чIавуз Каринадиз Урусатдин кьилин шегьердиз атун кьисмет хьаначиртIа, адан вилик дуьньядин музыкадин алемдиз рекьер ачух тахьунни мумкин тир. Лугьудайвал, лезги рушан бахтуни гъана. Москвада ада дуьньяда тIвар-ван авай пианист Виктор Бунинан гъилик кIелна. Гуьгъуьнлай консерваторияда кIелзавай чIавуз Каринадиз РСФСР-дин лайихлу артист Лев Наумова чирвилер гана.
15 йис хьайила, Карина Азизовади Италиядин Рагуза шегьерда кьиле фейи пианистрин международный конкурсдин премия къачуна. Гьа инлай лезги рушан машгьурвилин сергьятар гегьенш жез гатIунна. Гуьгъуьналлай йисара ада Италияда, Испанияда, Америкада, къецепатан маса уьлквейра конкурсра, концертра иштиракна, вич пешекар пианистка тирди кардалди субутна.
Испаниядин машгьур дирижер Виктор Паблодин теклифдалди, Карина Азизова и уьлкведиз куьч хьана. Хъсандиз лезги, урус чIалар чизвай рушаз са куьруь вахтунда испан чIални чир хьана. Каринадин гафаралди, Испанияда классикадин музыка вилик фин патал гзаф къулай шартIар тешкилнава. Жуьреба-жуьре йисара хьайи кризисдизни килиг тавуна, ина культурадин хилез гьар йисуз еке пулар ахъайзава. Чкадин халкьдизни классикадин музыка иллаки хуш я. Карина Азизовади Мадридда, Барселонада, Сантандерда, Ла-Коруньяда агъзурралди инсанар кIватI хьанвай майданрал дуьньядиз машгьур хьанвай устадрин эсерар тамамарна.
Каринадин яратмишунрин алемда кьилин чка классикадин музыкади кьазватIани, адан бейнида, руьгьда лезги манидизни чка ава. Руша чи халкьдин манийрихъ яб гузва. Адахъ гьакIни Готфрид Гьасанова кхьенвай эсерар тамамардай ва адаз бахшнавай кьилдин концерт тухудай фикирарни ава.
Чнани чи нубатда Карина Азизовадиз югъур сефер хьурай лугьузва. Къуй лезги рушан тIвар дуьньяда генани машгьур хьурай!
Мегьамед Ибрагьимов