И йикъара Кьурагьа, 1-нумрадин СОШ-дин спортдин майдандал, акьалтзавай несилдин арада футбол машгьурунин, спорт ва сагълам уьмуьр пропаганда авунин, спортсменрин устадвал хкажунин макьсаддалди, терроризмдихъ галаз санал женг чIугунин Йикъаз талукьарна, райондин школайра кIелзавай 2005-йисалди дидедиз хьанвай жаванрин арада мини-футболдай турнир кьиле тухвана. Идакай “Лезги газетдиз” райондин администрациядин пресс-къуллугъди хабар гана.
Алай йисуз коронавирусдихъ галаз алакъалу яз арадал атанвай гьалар фикирда кьуналди, турнирда анжах 4 командади иштиракна. Акъажунрин судьяйри къугъвазвай командаяр чип вегьиналди тайинарна. ИкI, ярумчух финалда Ашарин СОШ-динни КIирийрин СОСШИ-дин командайрин къугъун — 2:1, Кьурагьрин 1-нумрадин СОШ-динни КIирийрин СОШ-дин командайрин къугъун 9:0 гьисабдалди акьалтIна. Финалдани Кьурагьрин 1-нумрадин СОШ-дин командади Ашарин СОШ-дин командадал инанмишвилелди гъалибвал къазанмишна. Талукь тирвал, Ашарин СОШ-дин командади -2 ва КIирийрин СОСШИ-дин командадини 3-чкаяр кьуна.
Турнирдин тешкилатчийри вири командайриз кубокар, медалар, грамотаяр, пулдин ва къиметлу пишкешар гана. Турнирда виридалайни хъсан футбол къугъвадайди яз Сефералиев Сабир (Кьурагьрин 1-нумрадин СОШ) тайинарна. Адазни къиметлу пишкеш гана. Тамашачийриз чпин къугъун бегенмиш хьайибурни — Шамхалаев Шохрат (КIирийрин СОШ) ва Къурбанисмаилов Исмаил (Ашарин СОШ) пулдин пишкешар гуналди къейдна.
Гъалибчийрив ва призёррив шабагьар Кьурагь райондин физкультурадин, спортдин ва жегьилрин крарин рекьяй отделдин начальник Рамиз Рамазанова ва райондин ДЮСШ-дин завуч Руслан Бабаева вахкана.
«Лезги газет»
