Са шумуд югъ идалай вилик Сулейман-Стальский райондин Герейханован хуьруьн 1-отделенида Жуьрэтлувилин ордендин кавалер Роберт Къазиагьмедован экуь къаматдиз (гьакIни терроризмдихъ галаз санал женг чIугунин Йикъаз ва рикIел хуьнинни баркаллувилин Йисазни) бахшна, футболдай башламишнавай райондин турнир давам жезва.
Спортдин и мярекатдин макьсад районда футбол машгьурун, чпихъ бажарагъ авай футболистар дуьздал акъудун ва абуруз куьмекар гун, гьакIни спортсменрин арада дуствилин алакъаяр мягькемарун я.
Турнирдин сад лагьай юкъуз 4 къугъун кьиле фена. ИкI, “Алидхуьр” — “Агъа СтIал” — 3:2, “ЦIийи хуьр” — “Герейханован хуьруьн 2-отделение” — 5:0, “Алкьвадар” — “Герейханован хуьруьн 1-отделение” — 0:1 ва “Агъа СтIалрин-Къазмаяр” — “Вини СтIал” командайрин къугъунар 2:6 гьисабдалди акьалтIна. Гуьгъуьнин йикъара амай командайрини чпин устадвал къалурна.
Райондин администрациядин физический культурадин, спортдин, туризмдин ва жегьилрин крарин рекьяй комитетдин директордин заместитель Муслим Селимова хабар гайивал, и турнирда райондин 16 поселенидикай 12-дан хкянавай командайри чпин устадвал къалурна.
— Финалда 1 ва 2-чкаяр патал Курхуьруьнни ЦIийихуьруьн командайри, 3-чка патални Герейханован хуьруьн 1-отделенидинни Вини СтIалрин командайри чпин гьунарар къалурда. Финалдин бягьсер къе, 10-сентябрдиз, кьиле фида, — алава хъувуна ада.
«Лезги газет»
