ЦIийи йисуз Махачкъаладин “Анжи” командада са бязи дегишвилер хьана.
Сифте полузащитник Аяз Гулиевахъ галаз икьрар кьатIна. Москвадин “Спартакдин” футболист Гулиев хъипи-къацубурун патал алаз киридин ихтияррин бинедаллаз къугъвазвай.
2016/2017 ва 2017/2018-сезонра Аяза “Анжидин” футболка алаз 22 матчда иштиракна. Адан киседа “Арсеналдихъ” галаз къугъвайла ягъай (3:2) са туп ава.
Са тIимил вахт арадай фейила “Анжиди” Венесуэладин хкягъай командадин защитник Джон Чансельорахъ галаз контракт кутIунна. 26 йис хьанвай, вичин кьакьанвал 198 см тир, майдандин юкьвал жедай защитник икьрардин бинедаллаз кьве йисни зура чи командадин патал алаз къугъвада.
Вичин спортдин уьмуьрда Чансельор “Минерос Гуаяна”, “Депортиво Лара”, “Депортиво Ла Гуайра» ва Эквадордин “Дельфин” командайрик кваз Венесуэладин чемпионатда къугъвайди я.
Ахпа “Анжидинни” полузащитник В.Афонинан ва нападающий К.Базелюкан арада кIвалахдин икьрардин вахт куьтягь хьана.
Туьркияда гьеле сборра амай эхиримжи йикъара “Анжидин” ихтиярда Ганадай тир Квадро-Поку гьатна. КIвалахдин икьрарда, 2020-йисан 31-майдалди Квадро Поку Дагъустандин командадик кваз къугъвадайди къейднава.
Поку 2014-2017-йисара США-дин чемпионатда “Атлантадин”, “Нью-Йорк Ситидин” ва “Майамидин” патал къугъвана.
Покуди къейдайвал, ам Майамидай Стамбулдиз самолётда аваз саки 11 сятда ва анай гьа вахтунда “Анжи” аваз хьайи Антальядиз атана. Кеферпатан Америкадай Европадиз атун им ада вичин дережа хкажун патал авунвай кьетIен эвер гун я. “Им захъ фадлай авай фикир кьилиз акъудун хьана”, — къейдна ада.
Адан рахунрай малум хьайивал, “Анжидикай” Покудиз фадлай хабар авай.
— Гьелбетда, “Анжидикай” заз вад-ругуд йис идалай вилик — ина Самюэль Это’О къугъвай девирда ван хьанвай. ГьакIни заз ина зи ватандаш, Ганадин хкягъай командадин футболистни (Джонтан Ментан — алава) къугъвайди чизвай, — лагьана Покуди.
«Лезги Газет»
