ЦIинин йис амай кьван уьлкведа советрин халкьари чпин ивидалди къазанмишнавай ЧIехи Гъалибвилин 75 йис тамам хьунин сувариз талукь мярекатар кьиле тухун давам жезва. Шак алачиз, абуру инсанрин руьгьдин игьтияжар таъминарзава. Иллаки жегьил несилдиз уьлкведин тарихдикай, адан баркаллу халкьари Ватан хуьнин карда чIугур зегьметрикай хабарар гузва ва гьа идалди акьалтзавай несилдик ватанпересвилин, ам хуьз гьазур тирвилин гьиссер кутазва.
И йикъара, Дагъустандин телевиденидай къалурай передачади заз пара таъсирна. Ам дяведа цин кIаникай фидай луьткведин командир хьайи Советрин Союздин Игит Мегьамед Гьажиеваз, адан стхаяр контр-адмирал Альберт Гьажиеваз, тIвар-ван авай тарихчи Булач Гьажиеваз ва абурулай чешне къачузвай эвледриз талукьарнавайди тир. Передача журналист Гьажиева Зелфиради ва музейдин директор Мегьамедов Абдула кьиле тухвана.
Инал лугьун хьи, заз передача гзаф бегенмиш хьана. Заз, тарихдиз итиж ийизвай касдиз, анай гзаф затIарикай хабар хьана. Игит Мегьамед Гьажиеван тIвар мектебдин суьредихъ галамаз ван хьанай. ГьикI лагьайтIа, гьахьтин тIварни фамилия алайбур чи хуьрени, магьледани яшамиш жезвай. Сад тIвар-ван авай тежрибалу муаллим, Кеферпатан Кавказдин муаллимрин I съезддин делегат, Ватандин ЧIехи дяведин иштиракчи, инвалид яз хтай Мегьамед Гьажиев, муькуьдини — хуьруьн къелечи Мегьамед Гьажиев.
Гимидин капитан, Игит Мегьамедан уьмуьрдиз талукь делилар заз са вад йис идалай вилик Санкт-Петербургда акуна. Кьилди къачуртIа, ана Мегьамед Гьажиеван хсуси затIар, ам Ленинграддиз кIелиз атай вахтунин документар, адаз ганвай рекомендацияр, дипломар, адан командирвилин парталар, наградаяр ва ядигарар авай. Абур вири кьилдин кабинетда хуьзва. Адмиралрин, мадни чIехи военачальникрин портретрин арада Гьажиеван чIехи портретни авай.
ВикIегь командир, Советрин Союздин Игит Мегьамед Гьажиева вич хайи чил, Ватан, уьлкве виринриз машгьурна. Ам дагъустанвийри гьамиша чпин рикIера хуьзва. Ахьтин игитар чи къенин жегьилризни уьмуьрда гьамиша чешне хьун герек я. Чна вири игит рухвайрал гьахълудаказ дамахзава.
Райсудин Набиев
