Мегьарамдхуьруьн районда 1-4-классра кIелзавай вири аялар чими хуьрекралди таъминарнава. Идан гьакъиндай муниципалитетдин кьил Фарид Агьмедова республикадин гьукуматдин дережада аваз кьиле фейи совещанидал малумарна.
4-сентябрдиз Дагъустан Республикадин образованидин ва илимдин министрдин сад лагьай заместитель Ширали Алиеван регьбервилик кваз интернетдин куьмекдалди совещание кьиле фена. Ам умуми образованидин мектебра кIелзавайбур пулсуз чими тIуьнралди таъминарунин кIвалах тешкилунин месэладиз талукьарнавайди тир. Совещанида Мегьарамдхуьруьн райондин кьил Фарид Агьмедова ва администрациядин кьилин сад лагьай заместитель Фейруддин Рагьимханова иштиракна.
Мектебра кIелзавай аялар чими хуьрекралди таъминарунин месэла Россиядин просвещенидин министерстводин гуьзчивилик квайди я. И месэладал республикадин Кьил Владимир Васильевани гьам республикадин, гьамни муниципалитетрин исполнительный властдин органрин вири руководителрин фикир желбнава. Республикадин комиссияди РФ-дин просвещенидин министрдин заместитель Екатерина Толстиковадихъ галаз санал и кIвалах муниципальный районра ва шегьеррин округра гьикI тешкилнаватIа, ахтармишзава. Совещание кьиле тухудай вахтунда гъвечIи классра кIелзавай аялар пулсуз чими тIуьнралди таъминарунин барадай Россиядин Президентдин тапшуругъ кьилиз акъудунин месэла гьялзавай гьал веревирдна.
“Мегьарамдхуьруьн райондин вири мектебра 1-4-классра кIелзавай вири аялар пулсуз чими хуьрекралди таъминарзава. Хуьрекар гьазурун патал чкадал гьасилзавай ери авай суьрсет ишлемишунин везифа вилик эцигнава. Аялар патал гьазурзавай хуьрекар кфетлубур хьун, абур экологиядин жигьетдай михьи продукциядикай гьазурун герек я”, — малумарна райондин кьили ва и кардал Дагъустандин Гьукуматдин Председатель Артем Здуновани кьетIендаказ фикир желбнавайди къейдна.
Гьазурзавай хуьрекрин жуьрейрин патахъай ийизвай истемишунар санитариядинни эпидемиологиядин жигьетдай тайинарнавай къайдайрин бинедаллаз къайдадик кутазва. Хуьрекрин меню 10-14 йикъан вахтуналди тайинарзава ва мектебрин сайтра раижзава.
Совещание кьиле физвай вахтунда лазим тир къайдада тадаракламиш тавунвай пищеблокар авай мектебриз талукь месэлани веревирдна. Анра фад кардик кутаз жедай модульный пищеблокар ишлемишун, лазим авай чкайра капитальный ремонт кьиле тухун герек жеда.
Чи мухбир
