4-сентябрдиз са акьван яргъал чIугун тавур азардилай гуьгъуьниз дяведин ва зегьметдин, Яракьлу Къуватрин ва къайдаяр хуьдай органрин ветеранрин Сулейман-Стальский районда кардик квай Советдин председатель, отставкада авай полковник Абдулаким Абдулаевич Гьажимурадов кечмиш хьана.
Ам 1946-йисан 8-августдиз Сулейман-Стальский райондин Агъа Арагърин хуьре дидедиз хьана. 1967-йисуз лейтенантдин чин къачуналди, ПВО-дин кьушунрин Вильнюсдин ракетринни танкарин училище (РТУ) куьтягьна. 1974-йисуз В.В.Куйбышеван тIварунихъ галай военно-инженервилин академия акьалтIарна, оборонадин промышленностдин карханайра военный векил яз кIвалахна. 1979-йисуз Куйбышеван тIварунихъ галай ВИА-дин регьбервал гудай инженеррин составдин факультет лап хъсан къиметар аваз куьтягьна, Москвадин карханайра военный векил яз зегьмет чIугуна. 1984-1989-йисара Москвада военный рекьяй эцигунрин управленидин кьилин механик хьана.
1993-йисуз Удмуртия Республикадин ГО-дин штабдин инженервилинни технический отделдин начальникдин къуллугъдилай запасдиз фена. 2015-йисуз Сулейман-Стальский райондин дяведин ва зегьметдин, Яракьлу Къуватрин ва къайдаяр хуьдай органрин ветеранрин советдин председатель тир. Адахъ пуд велед ава.
Абдулаким Гьажимурадоваз 9 медаль ганва. Абурун арада “Женгинин гьунарлувиляй”, “В.И. Ленинан 100 йис тамам хьунин гьуьрметдай”, “Гьакъисагъ къуллугъдай” ва “СССР-дин Яракьлу Къуватрин 50, 60 ва 70 йисар тамам хьунин гьуьрметдай” медалар ава.
Чарадан дердиникай хабар кьадай, жавабдарвал аннамишунин къилихар авай кас яз хьайи Абдулаким Абдулаевича жуьреба-жуьре пешейрин ва яшарин инсанрин арада лайихлу гьуьрмет къазанмишна. Адаз районэгьлийрин арада гьуьрмет авай, ам гьакъисагъ, вичик умуд кутаз жедай кас тир. Ада чIехи несилдин итижар хвена ва акьалтзавай несилдин арада ватанпересвилин тербия гунин кIвалах активнидаказ кьиле тухвана.
Абдулаким Абдулаевича вичин уьмуьрдин рехъ ватандиз къуллугъ авуниз, обществода руьгьдинни ахлакьдин ивирар мягькемаруниз, хайи райондиз менфят гъуниз бахшна.
Сулейман-Стальский райондин руководстводи ва агьалийри Абдулаким Гьажимурадован веледриз, мукьва-кьилийриз, дериндай хажалат чIугунивди, башсагълугъвал гузва.
