Дагъустан Республикада “Хуьруьн мулкар комплекснидаказ вилик тухун” госпрограмма уьмуьрдиз кечирмишун давам жезва. Адан кар алай хилерикай сад хуьрера яшамиш жезвай агьалийрин яшайишдин шартIар хъсанарун я. И программадин бинедаллаз республикада хуьрера яшамиш жезвай 120 хизандив цIийи кIвалер агакьда.
Къейд авурвал, 2020-йисуз хуьрера яшамиш жезвай агьалияр кIвалералди таъминаруниз 80,1 миллион манат (адакай 76,1 миллион федеральный бюджетдай ва 4 миллион манат республикадин бюджетдай) чара авунва. Ихьтин такьатрикай менфят къачурла, Дагъустандин хизанривай 10,6 агъзур квадратный метрдин кIвалер маса къачуз жеда.
Пресс-къуллугъди малумарайвал, чара авунвай пулар тамамвилелди агьалийрив агакьарнава.
ТАСС-ди хабар гузвайвал, “Хуьруьн мулкар комплекснидаказ вилик тухун» госпрограммадин бинедаллаз алай йисуз Дагъустандиз 1,2 миллиард манат чара авун лазим я. И такьатрин куьмекдалди цин, газдин, образованидин, спортдин, медицинадин 25 объект эцигда.
«Лезги газет»
