Гьуьрметлу редакция! За гъиле къелем кьунин себеб ам я хьи, зун и йикъара, кефияр са тIимил чIур хьана, Кьурагь райондин КьепIиррин участковый больницадиз фена. Жуван сагъламвал мягькемарун патал са тIимил йикъара ана къаткана.
Алай девирда сада-садаз гьуьрмет авун, а патал алай касдин тIалдикай хабар кьун тIимил я. Амма, заз акурвал, КьепIиррин участковый больницада кIвалахзавай сарарин духтур Чергесов Пирмегьамед Мегьамедзагьировичакай икI лугьуз жедач.
Ам 1969-йисан 21-февралдиз Сулейман-Стальский райондин Шихидхуьре дидедиз хьана. Ана хъсан къиметар аваз юкьван школа куьтягьна. Сарарин духтур хьунал гзаф рикI алай. И пеше ада Красноярск шегьерда Военно-воздушный къуватра кьегьалвилелди къуллугъ авурдалай гуьгъуьниз къачуна. Ватандин вилик вичин хиве авай буржи кьилиз акъуддайлани, П.Чергесоваз командиррин патайни еке гьуьрмет авай. Хъсандиз къуллугъ авунай адаз са шумудра гьуьрметдин грамотаяр гана. Сарарин духтур хьунин къаст авай жегьил Смоленскдин госмедакадемиядик экечIна. 1998-йисуз анаг акьалтIарна. Гьа и йисуз ам Орел шегьердиз ракъурна. Ина ада вад йисуз кIвалахна, чирвилер генани артухарна. Гуьгъуьнлай П.Чергесова Дербент шегьерда, Кьасумхуьрел кIвалахна. Гила КьепIиррин участковый больницада сарарин духтур я.
Вичин инсанвилин къилихралди агьалийрин патай гьуьрмет къазанмишнава. Адан патав атай инсан нарази яз хъфей вахт хьайиди туш, гьикI хьи, Пирмегьамед а патал алайдан тIалдикай хабар кьадай кас я. ИкI, адан патав Кьурагь, Сулейман-Стальский районрай азарлуяр къвезва. Лугьун лазим я хьи, духтурди паталай къвезвай инсанриз, нубатдал вил алаз акъваз тийидайвал, тайин вахт эцигзава. Адан патав къвезвайбурун кьадарни гзаф я. Къуй квехъ мадни еке агалкьунар хьурай, духтур!
Батман Рагьимов, КIирийрин хуьр
