“Чи ватанэгьлияр — гьар сана” рубрикадин сергьятра аваз чна кIелзавайбур Дагъустандилай къецепата яшамиш жезвай лезгийрихъ галаз танишарун давамарзава. Къенин макъаладин кьилин игит Санкт-Петербургда тIвар-ван, еке гьуьрмет авай дагъустанвийрикай сад я. 2015-йисан октябрдилай ада Урусатдин таможнядин академиядин Санкт-Петербургда авай филиалдин проректордин-директордин везифаяр тамамарзава. Ихтилат таможнядин къуллугъдин генерал-майор, экономикадин илимрин доктор, профессор Сиражудин Нагъметуллаевич Гьамидуллаевакай физва.
С.Н.Гьамидуллаев 1957-йисан 1-майдиз Докъузпара райондин Къаракуьре хуьре дидедиз хьана. Юкьван мектеб акьалтIарайдалай кьулухъ, 1976-1978-йисара, СССР-дин Яракьлу Кьушунра къуллугъна.
Ватандин вилик буржи тамамарна хтай жегьил Ленинграддин политехнический академиядик экечIна. Алай вахтунда адакай ЧIехи Петрдин тIварунихъ галай Санкт-Петербургдин политехнический университет хьанва. Гуьгъуьнлай ада Урусатдин МВД-дин Санкт-Петербургда авай университетни акьалатIарна.
1994-йисалай чи баркаллу ватанэгьлиди вичин уьмуьр таможнядин органра кIвалахунихъ галаз алакъалу авунва. Ина кIвалахзавай йисара С.Гьамидуллаева уьлкведиз къанунсуздаказ гъизвай метягьрин вилик пад кьаз, жуьреба-жуьре къуллугърал зегьмет чIугуна. Кьилди къачуртIа, Урусатдин таможнядин академиядин Санкт-Петербургда авай В.Б.Бобкован тIварунихъ галай филиалда директордин заместителдин, Урусатдин таможнядин академиядин директордин заместителдин, Ростовда авай филиалдин директордин везифаяр кьилиз акъудна. 2015-йисуз ам Урусатдин таможнядин академиядин Санкт-Петербургда авай филиалдин проректорвиле-директорвиле тайинарна.
Урусатдин кьилин пешекарвилин образованидин гьуьрметлу къуллугъчи, таможнядин академиядин кIелунинни методикадин рекьяй кардик квай объединенидин член Сиражудин Гьамидуллаева илимдин рекьени агалкьунар къазанмишнава. Экономикадин илимрин кандидатвилин, докторвилин дережаяр хвена, 200-далай виниз илимдин макъалаяр, кьилдин ктабар, методикадин пособияр кхьена, маса алимрихъ галаз санал рентгендин къурулушдиз талукь цIийи затIар арадал гъана.
КIвалахдин рекье къалурнавай агалкьунрай адаз “Санкт-Петербургдин 300 йис”, “Гьакъисагъ зегьметдай”, “Таможнядин органра къуллугъ авунай”, “Таможнядин амадагвал мягькемарунай” медалар, хурудал алкIурдай “Таможнядин къуллугъдин отличник” знак, гьуьрметдин грамотаяр ва маса шабагьар ганва. Адан тIвар уьлкведа акъуднавай “Машгьур алимар” энциклопедияда гьатнава.
Сиражудин Гьамидуллаев чешнелу хизандин кьилни я. Уьмуьрдин юлдашдихъ галаз санал ада кьве велед чIехи авунва.
Лагьана кIанда, чи машгьур ватанэгьлиди, хайи чиливай яргъа яшамиш жезватIани, дидед чIал, милли адетар рикIелай алудзавач. Ада Санкт-Петербургда лезгийрин тешкилатди тухузвай вири мярекатра иштиракзава, акьалтзавай несилриз хайи чилин руьгьдин ивирар рикIелай алуд тавуниз эвер гузва.
Чи мурад Сиражудин Нагъметуллаевичахъ чандин сагъвал, кIвалахда мадни еке агалкьунар хьун я.
Мегьамед Ибрагьимов
