И йикъара РД-дин эцигунрин ва ЖКХ-дин министр Малик Баглиева Дербент райондин кьилин везифаяр тамамарзавай Наби Алиевахъ, гьукуматдин сад тир эцигунрин Дирекциядин руководитель Багьавдин Алиевахъ, райондин администрациядин кьилин заместителар Садир Эмиргьамзаевахъ, Эльман Аллагьвердиевахъ ва райондин УЖКХ-дин начальник Мурад Тагьировахъ галаз санал Дербент районда “Образование” ва “Демография” инвестицийрин программайрин сергьятра аваз Араблинка, Мугъарты хуьрера хкажзавай аялрин бахчаяр, Белиж посёлокда гъиле кьунвай школадин эцигунрин кIвалахар кьиле физвай гьал ахтармишна.
Араблинкада эцигунрин кlвалахар акьалтlарзава. Алай вахтунда дараматда къенепатан кlвалахар тамамарзава. Аниз эквер ва яд тухванва. Эцигунрин ва монтаждин кlвалахарзавай пудратдин карханадин кьиле авайбурун лугьунралди, 2020-йисан 1-сентябрдалди аялрин бахча куьтягьда.
Мугъарты хуьре Малик Баглиев ва Наби Алиев аялрин бахчадин къенепатариз, тlуьнар гьазурзавай кlвализ, бицlи аялриз гьазурнавай ял ядай ва къугъвадай чкайриз килигна.
Ина эцигунрин кlвалахар акьалтlарнава.
Белижда малум хьайивал, алай вахтунда пудратдин карханади, хандакIдилай башламишна, спортзал, тlуьнар гьазурдай блок ва актовый зал эцигиз гъиле кьунва.
Объектрал кlвалахар физвай гьалдиз килигайдалай гуьгъуьниз М. Баглиева къейд авурвал, эцигунринни монтаждин кlвалахар акьалтlарун — им дараматар ишлемишиз вахкуда лагьай чlал туш. Талукь вири документарни гьазурна кIанда. Малик Баглиев Геджухдизни фена.
Ина 9-августдиз, руфунин тlал аваз, 43 кас начагъ хьанай. Себеб хъвадай цихъ галаз алакъалу тир.
Райондин кьиле авайбуру тади гьалда кьабулай серенжемрин нетижада хъвадай цин линия истемишунрив кьадайвал къайдадиз хканва. Икl, авария хьайи участокда 200 метр яргъивал аваз цин линия цlийи турбайралди эвезнава, турбайрай яд ахъайзавай 147 чка туькlуьр хъувунва. Хъвадай цик хлор кутадай тадаракар эцигнава.
Вичин нубатдай М.Баглиева мад ихьтин дуьшуьшар арадал атуниз рехъ тагана кlанзавайди, гьакlни эцигунрин министерстводи райондиз эцигунрин кlвалахра куьмек гудайди къейдна.
Къагьриман Ибрагьимов
