2020-йисан 23-августдиз яргъал чIугур азардикди Хасавюрт райондин Къурушрин хуьре 50 йисуз акьалтзавай несилриз тарсар гайи муаллим, хейлин йисара “Лезги газетдихъ” галаз алакъаяр хвейи мухбир Эбил Алибович Бабиров рагьметдиз фена.
Э.А.Бабиров 1938-йисан 18-январдиз Докъузпара райондин Къурушрин хуьре малдаррин хизанда дидедиз хьана. Ада 10-класс ЦIийи Къурушдал акьалтIарна. СССР-дин Яракьлу Къуватрин жергейра пуд йисуз къуллугъайдалай кьулухъ ам Осетиядин госпединститутдин географиядин факультетдик экечIна. 1964-йисуз агалкьунралди вуз акьалтIарна. Гьанлай кьулухъ та пенсиядиз экъечIдалди хайи хуьруьн мектебда кIвалахна.
Эбил Алибовичан тIвар мухбир яз неинки тек са Хасавюрт районда, гьакIни “Лезги газет” кIелзавай вири Лезгистанда машгьур хьана. Ам “Коммунист”, “Лезги газет”, Хасавюрт райондин “Дружба” (“Дуствал”), хуьруьн “Зегьметдин пайдах”, гуьгъуьнлай “Къурушрин сес” газетрин рикI алай мухбир тир.
Эбил муаллим хайи чIалахъ, медениятдихъни эдебиятдихъ рикI кузвай кас тирди ада гьар подпискадин вахтунда тестикьардай. Гьайиф хьи, эхиримжи муьжуьд йисуз ам начагъ тир. ЯтIани, ада чи лезги чIалал акъатзавай газетарни журналар кхьизвай ва алакъаярни хуьзвай. “Лезги газетдин” 90 йисан юбилей хьайила, Эбил Алибовичаз, хуьрерин мухбиррин арада лап хъсанбурукай сад яз, Гьуьрметдин грамота ва пулдин премия ганай. Эбил муаллимдин шикил макъалани галаз “Лезги газетдин” юбилейдин махсус ктабдани гьатнава.
Эбил Алибович вичин пешедиз вафалу, къени, яр-дустунал рикI, мецел зарафатни хъвер алай суьгьбетчини тир. Гьавиляй ада тарсар гайи аялрин, хуьруьн жемиятдин патай гьуьрметни авторитет къазанмишна.
“Лезги газетдин” редколлегияди Эбил Алибович Бабиров рагьметдиз финихъ галаз алакъалу яз адан хизанриз, вири багърийриз башсагълугъвал гузва.
