Хьряй шегьердиз атай Гьажидин пул авай кисе, сиве-сивди инсанрив ацIанвай автобусда акьахайла, угърийри чинеба жибиндай акъудна. Кас са кепекни гвачиз амукьда. Ам, са таниш кас гьалтдатIа лугьуз, куьчейра къекъведа. Садлагьана адал хуьруьнви Шегьимердан гьалтда.
— Дуст, куьмек це, зун, жибинда кепекни амачиз, четин гьалда ава. За вав бурж, яргъал тевгьена, агакьар хъийида, — тIалабда Гьажиди.
Шегьимердана хуьруьнви кIвализ хкана, адаз тIуьн — хъунни гана. Пул атIа хъуьцуьгандин кIаник ква, къачу лугьуда. Виш манат а девирда еке пул тир. Са йисни алатна, амма бурж вахканач.
Нубатдин сеферда шегьердиз атай Гьажидив мад кепекни гумукьнач. Ам мад дустунин кIвализ фена. Шаз къачур пул Шегьимерданан рикIелай фенвай хьиз хьана, мад 100 манат пул вугун тIалабда.
— АтIа хъуьцуьгандин кIаник ква, къачу, — лугьуда кIвалин иесиди.
Хвеши жеда Гьажидиз ва ада хъуьцуьгандин кIаник гъил экъуьрда.
— Иник кIусни пул квач эхир, — вичин тажубвал къалурна мугьманди.
— Эгер вун хьтин дустари, хуьруьнвийри къачур буржар хкиз, вахкуз, чкадал эхцигиз хьанайтIа, аник пулни жедай! — хъсан насигьатдин тарс гана Шегьимердана намуссуздиз.
Гьазурайди- Ш.Шихмурадов
