Чубанриз

Дагъдин кукIвал алай чубан,

Ви кефияр хьурай кIубан.

Майишатдин язва вун чан,

Куьн лап зирек итимар я.

 

Куь зегьметдиз гурай къимет ,

Гьалалвилин къачуз зегьмет,

Ква вилик куь агъзур девлет,

Куьн лап зирек итимар я.

 

КичIе туш квез тIурфандикай,

Гьар са жуьре душмандикай,

Сев, жанавур, къабандикай, —

Куьн лап якъин малдарар я!

 

Ухулар

Кьилер булах, Агъа булах,

Кьуд патахъди гегьенш яйлах,

Куь яд хъвана, хьана саврах,

Эй зи Ватан — Ухул макан.

 

Гьар са чешне дарман я заз,

Гьар са жигъир масан я заз,

Гьар набатат лукьман я заз,

Эй зи Ватан — Ухул макан.

 

Шалбуз дагъдин ава кIане,

Гьамиша вун ава рикIе,

Ашкъилу я зун ви рекье,

Эй зи Ватан — Ухул макан.

«Лезги газетдин» 2020-йисан 34-нумрадай

________________________________________________________________________________

Халикьдихъай кичIе хьухь!

 

Хъсан кар я авун фикир,

Гьадакай чаз жеда хийир,

Ийиз алахъ пара зикир,

Чун паталди хъсан жеда.

 

Халикьди чаз ганва кьил,

Фагьум-фикир авун патал.

ГьакI авуртIа жедач сефил,

Писни хъсан кьатIун патал.

 

Масадан яд мийир рагъул,

Амукьда вун хьана сугъул,

Квахь хъийида авай акьул,

Халикьдихъай кичIе хьухь ваз.

 

Эй, инсан, вун инсан я,

Хъсан кар ви игьсан я,

ЯтIани вун яман,

Халикьдихъай кичIе хьухь ваз.

 

Эгъуьнмир на масадаз фур,

А фуракай жеда ваз сур,

Винелайни хгуда кIур,

Халикьдихъай кичIе хьухь ваз.

* * *

Къанун-къайда хуьз хьайитIа,

Диндин рекьяй физ хьайитIа,

Аллагь рикIел гъиз хьайитIа,

Чун паталди хъсан я, дуст.

 

Уьмуьр вуч я, са легьзе я,

Фикир гайла — са зерре я.

Иман патал къачун зегьмет,

Къазанмишиз жуваз женнет.

 

Зун ухулви Нариман я,

Динни иман зи дарман я,

Эй, уьмуьр, вун заз масан я,

Вун баркалла алайд хьурай!

 

Халикьдикай хьухь квез кичIе,

ЧIуру хиял твамир рикIе,

Чира илим, кIела Къуръан,

Гьич гаф гъимир мецел тапан.

«Лезги газетдин» 2021-йисан 5-нумрадай.