Алай йисан 14-17-августдин йикъара Дагъустан Республикада “Каспий — дуствилин гьуьл” тIвар алаз регионрин амадагвилин фестиваль кьиле фена. И важиблу мярекатда Россиядин Федерациядин 22 субъектдин, милли автономийрин ва Кьиблединни Кеферпатан Кавказдин Федеральный округрин векилри, журналистри иштиракна.
Кар алай мярекатар Дербент шегьерда кьиле фена. Гзаф чкайрай атанвай мугьманар чехиррин заводдиз, Нарын — къеледал, жуьмя мискIиндиз, килисадиз фена.
Образованидиз талукь семинарра Дагъустан Республикадин туризмдин ва халкьдин художественный сеняткарвилин рекьяй министр Расул Ибрагьимова, РД-дин информатизациядин, алакъадин ва массовый коммуникацийрин министр Сергей Снегирева, Россиядин Федерациядин Общественный палатадин член Маргарита Лянгеди, Дербент шегьердин администрациядин къуллугъчийри иштиракна. Абуру республикада этнотуризм ва регионрин этнобрендар гьикI вилик тухудатIа, и карда массовый информациядин такьатрикай гьикI менфят къачудатIа веревирд авуна. Фестивалдин иштиракчийри элкъвей столрихъ жуьреба-жуьре темайрай чпин проектар, туриствилин ва краеведенидин программаяр къалурна.
Фестиваль РД-дин туризмдин ва халкьдин художественный сеняткарвилин рекьяй министерстводи, Дербент шегьердин администрацияди, Дагъустандин татаррин милли культурадин “Туган Тел” общественный организацияди тешкилна.
Чи мухбир
