Дагъустандин здравоохраненидин министр Жамалудин Гьажиибрагьимова “Къайгъудар Гьукумат” (“Бережливое правительство”) проектдин регьбер Дмитрий Репьев кьиле авай, “Росатом” госкорпорациядин векилрин делегациядихъ галаз кIвалахдин рекьяй гуьруьш кьиле тухвана. Вад юкъуз Дагъустанда командировкада хьунин сергьятра аваз, мугьманар “Нетижалу гьукумат” проектдихъ галаз таниш хьун пландик ква ва и рекьяй республикадин гьукуматдихъ галаз гележегда санал кIвалахдай камар лишанламишда.
Региондин здравоохраненидин министерстводин регьбердихъ галаз гуьруьшдал Россиядин Оборонадин министерстводин проектдай Каспийскда, Дербентда ва Хасавюрт райондин Ботаюрт хуьре эцигнавай пуд медцентр ачухуникай ва гележегда абур ишлемишуникай рахана. Росатомдин векилар Каспийскдин госпиталдиз физ, ам туькIуьр хьанвай тегьердиз тамашиз агакьнава.
Алай вахтунда цIийи центрайра, финансрин федеральный министерстводихъ галаз сад-садав кьадайвал авуна, штатдин расписание арадал гъизва, адалай кьулухъ медицинадин идарайриз лицензия гун ва азарлуяр патал ракIарар ачухун лазим я.
ТIугъвал акьалтIайла, цIийи центрайра эцигнавай диагностикадин алай аямдин тадаракар, Жамалудин Гьажиибрагьимован гафаралди, жигеррин азарар лап фад винел акъудун, гьакIни жуьреба-жуьре азарар — онкологиядин, рикIинни дамаррин къурулушдин, нейрохирургиядинни неврологиядин ва икI мад хилерай сагъарун патал ишлемишиз жеда. Чпин нубатдай яз, Росатомдин векилри чпихъ и рекьяй тежриба авайди ва и месэла гьялун патал чеб вири патарихъай куьмек гуз гьазур тирди къейдна.
Региондин эпидемиологиядин гьаларикай рахадайла, министрди къейд авурвал, абур, гьа виликдай хьиз, къурху кутадайбур яз амазма. “Чун датIана гьазур яз акъвазнава. Къенин юкъуз 2-нумрадин РКБ-да 350 койка авай отделение чна резервда хуьзва”,-хабар гана ада. Министрди республикадин агьалийри пешекаррин меслятрал (нерал ва сивел маскаяр алукIунин, арада мензил хуьнин месэлайра) амал авуник генани умуд кутазвайди лагьана.
Дугъриданни, республикада гьалар гзаф муракаббур я. Мисал яз, Ногъай районда СОVID-19 азар акатнавайбурун кьадар садлагьана гзаф хьанва. Идакай райондин больницадин кьилин духтур Фаризат Межитовади алатай ислен юкъуз короновирусдихъ галаз женг чIугвадай чкадин оперативный штабдин заседанидал хабар гана.
“Къенин юкъуз короновирусдин азардиз талукь яз гьалар лап чIурубур я лугьуз жеда. Эхиримжи гьафтеда цIийи 21, вири вахтунда районда 550 дуьшуьш малум хьанва. Ибурукай 216 дуьшуьшда СОVID-19 азар квайди тестикь хьанва, им лагьайтIа, республикадин юкьван гьисабдин делилрилай 3 сеферда артух я”, — адан гафар агакьарзава райондин администрациядин пресс-къуллугъди.
Ф.Межитовадин гафаралди, алай вахтунда стационарда 66 кас сагъарзава. Абурукай 8 кас СОVID-19 азар квайбур я, 58 касдикни — вирусди арадал гъанвай стIалжем. Амбулаторияда — 21, гьа гьисабдай яз 18 кас СОVID-19 азар квайбур ва пудни стIалжем хьанвайбур сагъарзава. 15-августдилай азарханада СОVID-19 азар квайбур патал 60 койка чара хъувунва, 17-августдилай поликлиникада азаррин вилик пад кьуниз талукьарнавай серенжемар ва чIехибурун диспансеризация акъвазарнава.
И делилризни килиг тавуна, райондин оперативный штабди короновирусдиз талукь яз эцигнавай сергьятламишунрин кьвед лагьай пай алудунин кIвалахар давамарунин къарар кьабулнава.
«Лезги газет»
