РФ-дин сенатор Валерий Рязанскийди гьисабзавайвал, аялар авай хизанриз мад гъилера пулар гуниз талукь къарар анжах мукьуфдивди веревирд авурдалай кьулухъ кьабулда. Идан гьакъиндай “ЦIийивилер” РИА-ди хабар гузва.
“Агьалийриз куьмек яз алава пулар гун патал къарарар кьабулнатIани, алай йисуз уьлкведин бюджетдай ихьтин харжияр авун фикирдиз къачунвайди тушир. Сифте нубатда чна чи премьер-министр вич фенвай Дальний Востокдай хтун гуьзлемишна кIанда. Адахъ галаз рахунар кьиле тухвайдалай гуьгъуьниз, алава пулар герек ятIа, агьалийриз куьмек яз мад гьихьтин камар къачун лазим ятIа, гьадан патахъай веревирдер ийида”, — малумарна Валерий Рязанскийди.
РФ-дин зегьметдин министерстводи хабар гузвайвал, 16 йисал къведалди яшарив агакьнавай аялар патал пулар 26 миллион касди къачуна. А пулар Пенсионный фондуна авай делилрин бинедаллаз гана. И фондунай диде-бубайри апрель-июнь варцара 3 йисал къведалди яш хьанвай аялар патал гьар вацран пособияр, 3 йисалай 16 йисал къведалди яш хьанвай аялар патал садра гузвай пулар къачуна.
Чи мухбир
