13-январдиз РД-дин Кьилин везифаяр вахтуналди тамамарзавай Владимир Васильева республикадин СМИ-рин регьберрихъ галаз гуьруьш кьиле тухвана. Дуствилин кIвале кьиле фейи мярекатда гьакIни Дагъустандин Халкьдин Собранидин Председатель Хизри Шихсаидова, республикадин Гьукуматдин Председателдин везифаяр вахтуналди тамамарзавай Абдусамад Гьамидова, РД-дин Кьилин ва Гьукуматдин Администрациядин кьил Владимир Иванова ва масабуру иштиракна.
Саки кьве сятда давам хьайи гуьруьшдин сергьятра аваз, республикадин журналистри Владимир Васильеваз жуьреба-жуьре суалар гана: Махачкъалада, Дербентда, Каспий гьуьлуьн къерехда къанунсуздаказ эцигзавай дараматрилай гатIунна кадрийрин жигьетдай кьиле тухузвай сиясатдал къведалди.
Дагъустандин Кьили къейд авурвал, мукьвара Гьукуматдин аппаратда ва республикадин гьукумдин маса органра кIвалахзавай къуллугъчийрин кьадар тIимиларда. Владимир Васильеван гафаралди, цIийи Гьукуматдилай ерилудаказ кIвалахиз алакьда.
Ада гьакIни мукьвара Дагъустандиз прокуроррикай ибарат махсус десте къведайдакайни хабар гана. Къейд ийин хьи, 17-январдилай уьлкведин жуьреба-жуьре регионрай тир пешекар прокурорри са вацра республикада государстводин ва агьалийрин итижар хуьнихъ галаз алакъалу вири къурулушра ахтармишунар кьиле тухуда. Дестедиз РФ-дин Генеральный прокурордин заместитель Иван Сыдорука регьбервал гудайвал я. Гьа са вахтунда Владимир Васильева алава хъувурвал, ахтармишунрин нетижада республикадин гьукумдин бязи векилар четинвилерални расалмиш хьун мумкин я.
Дагъустандин Кьили гайи жавабрай малум хьайивал, са гъвечIи девирда регионда авай гьаларай тамамдиз кьил акъудун муракаб месэла я, амма лап мукьвара дагъустанвияр республикада кадрийрин жигьетдай кьиле фидай дегишвилерин шагьидар жеда. Владимир Васильеван гафаралди, кIвалахиз, ихтибарзавай везифаяр кьилиз акъудиз тежезвайбур халис пешекарралди эвезда.
Ногъайрин “Голос степи” газетдин кьилин редактор Эльмира Кожаевади республикадин Кьиливай “Дагъустан” РГВК каналдин эфирда ногъай чIалал передачаяр авачирвиляй абур гьазурун патал, газетдиз, савкьат яз, пулдин грант гун тIалабна. Владимир Васильева къейдна хьи, вич савкьатар я гудайбурукай, я къачудайбурукай туш. Амма Эльмира Кожаевадин тIалабун фикир тагана амукьнач: региондин Кьили Абдусамад Гьамидовал ногъайрин газетдихъ галаз алакъалу месэладиз килигун тапшурмишна.
Гуьруьшдин вахтунда РД-дин “ИКЦ” ГБУ-дин руководитель Мухтар Амироваз, ихьтин савкьат региондин цIийи Кьили кьабул тавуна жеч лагьана, Васильеваз “Зун Путинан терефдар я” кхьинар алай шарф багъишиз кIан хьана. Амма Владимир Васильева савкьат кьабулнач, ам багъишай касдин гардандиз вегьена.
Са журналистди Владимир Васильевавай интервью тухун патал “сад лагьай ледидихъ” галаз гуьруьш тешкилун тIалабна. Республикадин Кьили вичин уьмуьрдин юлдаш сад лагьай леди туширди, ам сиясатдал машгъул тежезвайди, адан кьилин везифа кIвалин-къан дердияр кьиле тухун, хтулдиз тербия гун тирди лагьана. Журналистри хтул гатуз Каспий гьуьлел ял ягъиз Дагъустандиз къведачни лагьана жузурла, ада и месэла бадеди гьялзавайдакай хабар гана. РикIел хкин, республикадин Кьилин везифаяр вахтуналди тамамарзавайди гилани мугьманханада яшамиш жезва, хизан лагьайтIа, Москвада ава.
Мярекатдал журналистри республикадин государстводин газетрин статусдиз, кесерлу ва къуватлу спортсменри дуьньядин, Европадин дережадин акъажунра маса уьлквейрин пайдахрик кваз иштиракуниз, авайвал кхьейла, бязи чиновникриз гьяз текъвезвайвилиз, хайи чIалариз, экономикадиз, яшайишдиз, экологиядиз, туризмдиз, Россиядин Президент хкядай сечкийриз… талукь суаларни гана.
Мярекатдин эхирдай Владимир Васильева алава хъувурвал, прессадин патай критикадив ам гъавурда акьуналди эгечIзава. Ада гьакIни гуьруьшдин иштиракчияр республикада гьукум ачухди ва михьиди жедайдахъ инанмишарна.
Куьруь къейд.
Роскомнадзордин РД-да авай Управленидин делилралди, алай йисан эвел кьилера Дагъустанда регистрация авунвай 400-дав агакьна СМИ-яр кардик ква, абурукай 90 муниципалитетринбур я
Республикада “Дагъустан” РГВК медиа-холдинг, хабаррин “Дагъустан” агентство, Дагъустан Республикадин официальный печатдин орган тир “Дагестанская правда” газет, милли чIаларал акъатзавай газетарни журналар ава. Государстводин СМИ-ра кIвалахзавай къуллугъчийрин кьадар 939-дав агакьзава. 2017-йисуз СМИ-рин государстводин заказдин ва субсидийрин кьадарди 363,2 миллион манат тешкилна.
Къейд ийин хьи, республикада федеральный СМИ-рин векилханаяр кардик ква: “Первый канал”, “ВГТРК”, “5 канал-Санкт-Петербург” каналрин мухбиррин пунктар, хабаррин “Интерфакс”, “РИА-Новости”, “ТАСС” агентствойрин, “Российская газета”, “Московский комсомолец”, “Аргументы и факты” газетрин векилханаяр.
Мегьамед Ибрагьимов