И йикъара Сулейман-Стальский райондин Кьулан СтIалрин Р.Халикьован тIварунихъ галай мектебда 16 йис ва адалай виниз яшар хьанвайбурун арада шахматрайни тIамайрай акъажунар кьиле фена.
Спортдин ветеран Вавилон Рашидович Къазиев рикIел хкуниз талукьарай спортдинни зигьиндин турнир райондин физкультурадин, спортдин, туризмдин ва жегьилрин крарин рекьяй комитетди тешкилна.
Мярекат винидихъ тIвар кьунвай комитетдин директордин заместитель М.Селимова ва турнирдин кьилин судья Х.Халилбегова тебрикдин гафаралди ачухна. Къизгъиндаказ къугъунар кьиле финин нетижада шахматрай 1-чка Кьулан СтIалдилай тир Халилбег Халилбегова кьуна. Кьвед ва пуд лагьай чкаяр Руслан Малабаевани (Вини СтIал) Руслан Тагъиева (Курхуьр) кьуна.
ТIамайрал виридалайни хъсандиз Анвар Абдусамедов (Кьулан СтIал) къугъвана. И акъажунра кьвед ва пуд лагьай чкаяр Мурсал Шихрагьимовани (Курхуьр) Мелон Сирхаева (Кьулан СтIал) кьуна. Гъалибчийризни хъсан чкаяр кьурбуруз грамотаяр ва пулдин пишкешар гана.
Къейд ийин, акъажунар кьиле фидай вахтунда Роспотребнадзорди тайинарнавай санитариядинни эпидемиологиядин вири истемишунрал амална.
Чи мухбир
