31-июлдиз мусурманри Къурбанд сувар къейдна. И юкъуз Дагъустандин хейлин мискIинра дарда, игьтияж авай хизанриз къурбандрин як паюн патал мергьяматлувилин серенжемар кьиле фена. Гьа жергедай яз — Махачкъалада кардик квай имам аш-Шафиидин тIварунихъ галай мискIиндани (имам — Тажидин гьажи Къазибегов).
Къурбанд авунихъ мусурман патал авай хийирдикай газетдин виликан нумрайрикай сада гегьеншдиз кхьенвай. Къурбандрин важиблувал фикирда кьуна, винидихъ тIвар кьунвай мискIиндиз капI ийиз физвай лезги халкьдин векилри дарда авай хизанриз куьмекдин гъил яргъи авунин мураддалди суварин юкъуз мергьяматлувилин мярекат тешкилун кьетIна. Тажидин Къазибегован гафаралди, мярекатдин сергьятра аваз 100 хизандин арада 300 кг як пайна. Санлай къачурла, 15 гьер тукIунвай.
Идалайни гъейри, аш-Шафиидин тIварунихъ галай мискIиндиз физвай лезги стхайрин куьмекдалди Къурбанд суварин юкъуз ихьтин мярекатар Ахцегь (2 мал тукIуна), Сулейман-Стальский (5 гьер тукIуна) ва Хив районрани (3 гьер тукIуна) кьиле тухвана.
Имам Тажидин Къазибегова къейд авурвал, мискIин Аллагьдин кIвал я. Ам тек са капI авун патал арадал гъанвач. МискIинди алай аямда жемиятдин уьмуьрда кьетIен чка кьунва. Кьилди имам аш-Шафиидин тIварунихъ галай мискIиндикай рахайтIа, ина хийир-шийирдин (инсан кьейила, ам фаракъат авунин, некягьдин) месэлаяр гьялзава, уьмуьрдин четин шартIара гьатнавайбуруз куьмекзава, тербиядин рекьяй кIвалах тухузва, акьалтзавай несилриз Исламдин илимрай чирвилер гузва…
“Газетдикай менфят къачуна, заз, чи ватанэгьлийрихъ элкъвена, лугьуз кIанзава: инсандал уьмуьрда жуьреба-жуьре четинвилер ацалтзава. Бязи дуьшуьшра гзафбур са меслятдихъ, насигьатдихъ муьгьтеж жезва. Гьихьтин четинвилер гьалтайтIани, квевай гьар садавай, чи мискIиндиз атана, куьмек тIалабиз жеда. Аллагьдин кьадардалди, чна алакьдай куьмекни гуда”, — лугьузва Тажидин Къазибегова.
Гьакъикъатдани, эхиримжи йисара Аллагьдин рекье мергьяматлувилер ийизвай мусурман стхайрин, вахарин кьадар артух жезва. МискIинар лагьайтIа, ахьтинбур санал кIватIзавай, агудзавай маканриз элкъвезва. КIевевай, куьмекдихъ муьгьтеж хизанар вири районра, хуьрера ава. И кар фикирда кьуна, мумкинвилер авай стхайрин куьмекдалди ихьтин мярекатар гьар са хуьре тешкилайтIа, хъсан я. И рекье имам аш-Шафиидин тIварунихъ галай мискIиндилай чешне къачуз жеда. Къуй виридан садакьаяр Аллагьди кьабулрай. Амин!
Агьмед Магьмудов
