Алатай саласадиз Махачкъалада, “Дагъустандин правда” газетдин конференц-залда, республикада мяденрин чиликай хкуддай менфятлу шейэриз ва чилер са категориядай маса категориядиз хкуниз талукь месэлайрай пресс-конференция кьиле фена. Ана Дагъустандин чилерин ва эменнидин алакъайрин рекьяй министр Агъарагьим Къагьиргьажиева, РД-дин тIебиатдин ресурсрин ва экологиядин министрдин сад лагьай заместитель Заур Римиханова, Дагъустандин хуьруьн майишатдин ва недай суьрсетдин министр Абзагьир Гьуьсейнова, РД-дин архитектурадин ва градостроительстводин Комитетдин председатель Незир Гьуьсейнова иштиракна.
Пресс-конференциядал асул гьисабдай республикадин къумадин карьерриз талукь месэла гегьеншдаказ веревирдна. Адакай рахадайла, А.Къагьиргьажиева къейд авурвал, виридалайни гзаф гьалтзавай четин месэлайрикай сад документар тамамвилелди кIватI тавунихъ галаз алакъалуди я. ИкI, Дагъустандин чилерин ва эменнидин алакъайрин рекьяй министерстводин сайтда лазим документрин сиягь аватIани, бизнесменри адал амалзавач. И месэладин гьакъиндай абуруз меслятар гунин кIвалахдиз артух фикир гуз чалишмиш жезва.
— Республикадин мулкара чеб чпелай арадал атанвай карьерар гзаф ава. Чи везифа абуру республикадин бюджетдиз къазанжияр гъун, агьалияр кIвалахдай чкайралди таъминарун я. Гьавиляй чна алакьдай жуьредин вири куьмекар гузва ва и кардал кIукI гъиз алахъзава. Бизнесменди документар республикадин гьукуматдиз рекье тун лазим я. Анайни — минимуществодиз. Чна а документрин бинедаллаз къарардин проект гьазурзава, республикадин юстициядин министерстводиз ва прокуратурадиз рекье твазва. Вири идарайрай разивал агакьайдалай кьулухъ чна проект мад сеферда республикадин гьукуматдиз рекье хутазва. Анайни -Росреестрдиз. Гьа ихьтинди я са категориядай маса категориядиз элкъуьрун патал кьиле тухунин къайда, — гъавурда туна Агъарагьим Къагьиргьажиева.
Вичин нубатдай яз рахай министр Абзагьир Гьуьсейнова чпин кIвалах акъвазарнавай карьеррин кьадар-кьисметдикай, яни а чилерин бегьерлувал арадал хкунин месэла къарагъарна. Адан гафарай мадни малум хьайивал, республикадин вири чилер са категориядай маса категориядиз хкиз жезвач. Ахьтинбурук хуьруьн майишатдин кIвалахар патал ишлемишзавай чилер, уьзуьмлухар, цик квай чкаяр, тамар, гьуьлуьн кьер ва икI мад акатзава, яни тIварар кьунвай и чкайра карьерар ачухдай ихтияр авач.
Заур Римиханова РД-дин тIебиатдин ресурсрин ва экологиядин министерстводи республикадин карьеррин кIвалахдал гуьзчивалзавайди, и рекьяй еке кIвалах тухунин нетижа яз, къенин юкъуз законсузвилелди кIвалахзавай гьич са карьерни чина авачирди къейдна. Адан гафарай мадни малум хьайивал, бязи вахтара машиндиз (техника галачиз) анжах гъили къум язавай, ам чуьнуьхзавай дуьшуьшар винел акъатзава. Амма республикадин къанун-къайда хуьдай органрин къуллугъчийрихъ галаз санал ахьтин дуьшуьшрин вилик пад кьазва, ахьтин ксар (алатай йисуз ахьтин 400-далай виниз дуьшуьшар дуьздал акъудна) административный жавабдарвилиз чIугуна.
Эхирдай журналистри мугьманриз карьерар ачухунихъ ва и бизнес вилик тухунихъ галаз алакъалу тир са жерге суалар гана.
Рагнеда Рамалданова
