Женг давам жезва

Коронавирусдихъ галаз женг чIугунин мураддалди Къазахстандин агьалияр куьчейра маскаяр алукIуниз мажбурнава. Идакай алатай гьафтеда “Tengrinews.kz” чешмеди малумарна.

Гьукуматдин санитариядин кьилин духтурдин къарарда къейднавайвал, неинки дараматрани улакьра, гьакI куьчейрани маскаяр алукIун чарасуз я.

Къазахстандин президент К.-Ж.Токаева карантиндин муддат 1-августдалди артухар хъувуна. Сергьятламишунин серенжемар ана тIугъвалдин гьалар пис хьуникди июлдин сифте кьилера кардик кутунай.

Мад Китайдик тахсир кутуна

ЧIехи пай америкавийрин фикирдалди, дуьньяда коронавирус чукIунин тахсир Китайдик ква. Америкадин агьалийри Вашингтонди Пекиндик кутазвай тахсир гьахълуди яз гьисабзава. Идан гьакъиндай Pew Research Center-дин ахтармишунрин делилри шагьидвалзава.

Америкадин 78 процент агьалийри Китайдин гьукуматдин бязи гьерекатар себеб яз вирус чкIана лугьузва.

Идалай вилик США-дин президент Д.Трампа Китай жавабдарвилиз чIугун хиве кьунай.

5-августдин экуьнахъ малум тир делилралди, дуьньяда коронавирус акатайбурун кьадар 18 541 862-дав агакьнава. 700 683 кас кьенва, 11 142 031 — сагъар хъувунва.

Россияда 861 423 касдик вирус акатна. Кьенвайбурун кьадар 14 351-дав агакьнава, 661 471 кас сагъ хъхьанва.

Дустагъдал гьужумна

Россияда къадагъа авунвай террористрин международный тешкилатдин боевикри Афгъанистандин Джелалабад шегьерда авай дустагъдал гьужумна. “Associated Press” чешмедал асаслу яз, идакай “Лента.ру” сайтди хабар гузва.

Агьвалат 2-августдиз кьиле фена. ЧIуру къаст аваз, чандилай­ни гъил къачур террористди, автомобилда аваз дустагъдин дараматдин варарин патав фена, анал хъиткьинунар арадал гъана. Адалай кьулухъ боевикри дустагъдин къаравулриз цIай гана. Ягъу­нар 3-августдизни давам хъхьана. Афгъанистандин оборонадин министерстводин делилралди, нетижада агъа кIан 50 кас кьена. Вилаятдин губернатордин векилди кьейи 29 касдикай хабар гана. Абурук гражданский ксар, дустагънавайбур, къаравулар ва Афгъанистандин хатасузвилин къуватрин къуллугъчияр ква.

Къейдзавайвал, боевикри гьужумай вахтунда дустагъда 1500-дав агакьна кар атIанвайбур авай, абурукай са шумуд виш — Рос­сия­да къадагъа авунвай террористрин тешкилатдин членар. Абурукай са пай гьужум авур вахтунда катна, гзафбур хкьун хъувуна.­

Тади къачуз кIанзавач

Абхазия Россиядихъ галаз часпар ахъайиз гьазур я, амма та­йин югъ лугьун гьелелиг фад я. ТАСС-ди раижзавайвал, ихьтин­ фикир республикадин президент А.Бжанияди лагьана.

Адан гафаралди, Абхазияди Россиядихъ галаз авай сергьят мукьвара ахъайда. “И кар Россиядин терефдихъ галаз санал къарар кьабулайдалай кьулухъ декьикьайрин къене кьиле фида”, — гъавурдик кутуна Бжанияди.

Идалай вилик Россияди Абхазиядихъ галаз сергьят 1-августди­лай ахъаюнин къарар кьабулайдакай раижнай. Гьа и йикъалай­ Россияди международный авиациядин алакъаярни гуьнгуьна хтуна. ТIугъ­­валдихъ галаз алакъалу гьалар фикирда кьуна, авиа­циядин ала­къаяр арадал хкунин уьлквейрин сиягь къвердавай гегьенш жеда.

Тергиз хьун намумкин я

ВОЗ-дин регьбер Т.Гебрейесуса малумарайвал, COVID-19 терг ийиз жедай хьтин дарман авач ва, мумкин я, садрани тахьун. Адан фикир «Reuters» чешмеди раижна.

Женевада ООН-дин штаб-квартирадай интернетдин куьмекдалди кьиле тухвай брифингдин вахтунда ВОЗ-дин кьили къейд авурвал, алай вахтунда азардиз акси яз арадал гъанвай са жерге вакцинаяр синагъдай акъудунин пуд лагьай этапдал ала. Ада вири уьлквейриз къайдайрал амалуниз эверна.

Азарханаяр ацIанва

Ливандин здравоохраненидин министр Мугьаммед Гьасана малумарайвал, Бейрутдин азарханаяр портуна арадал атай хъиткьинунин нетижада хасаратвал хьайибурай ацIанва. И кардихъ галаз алакъалу яз, ада зарар хьанвайбур меркездилай къерехдиз тухун истемишна.

4-августдин нянихъ Бейрутда арадал атай хъиткьинунин нетижада кьейибурун ва хасаратвилер хьайибурун кьадардин жигьетдай гьелелиг тамам делилар малум туш. 5-августдиз авай делилралди, мусибатдин дуьшуьшдин нетижада 4 агъзурдалай гзаф ксариз зарар хьана, вишелай гзафбур кьена.

Губернатордин делилралди, шегьердин са пай дараматриз зиянар хьанва. МВД-ди малумарайвал, хъиткьинунар арадал атунин тайин себеб гьелелиг чириз алакьнавач. Ливандин умуми хатасузвилин къуллугъдин генерал А.Ибрагьима, виликамаз авай делилрал асаслу яз хабар гайивал, портуна яргъал вахтуналди хвейи хъиткьиндай затIарик цIай акатна. Ливандин къуватдин къурулушрин делилралди, хъиткьинунар ана сваркадин кIвалахар кьилиз акъуддайла арадал атана.

«Лезги газет»