2020-йисан 6 вацран вахтунда Дагъустанда, санлай къачурла, 26,6 миллиард манатдилай артух кьадарда аваз хуьруьн майишатдин суьрсет гьасилнава. Им, алатай йисан гьа и вахтунин делилрив гекъигайла, 0,5 процентдин агъуз кьадар я, хабар гузва Государстводин статистикадин федеральный къуллугъдин РД-да авай управленидин пресс-къуллугъди.
“Алатнавай зур йисан вахтунда малдарвилин хиле гьасилнавай якIун (гьайвандал чан аламаз алцумнавай) кьадар, алатай йисан гьа и вахтунив гекъигайла, — 0,4 процентдин, некIедин 0,7 процентдин гзаф хьанва. Какайрин кьадар лагьайтIа, — 2 процентдин тIимил”, — къейднава малуматда.
2020-йисан 1-июлдин делилралди, вири жуьредин майишатра авай ири карч алай гьайванрин кьадар (алатай йисав гекъигайла) 0,9 процентдин тIимил ва тахминан 1 миллионни 35 агъзурдаз барабар хьанва, лапагрин ва цIегьерин кьадар, 0,2 процентдин артух хьанва (тахминан 5 миллионни 197 агъзур). Къушар лагьайтIа, цIи шазандалай 10,9 процентдин тIимил ава (4 миллионни 743 агъзур), гьа жергедай яз хуьруьн майишатдин карханайра — 14,7 процентдин (767,9 агъзур).
2020-йисан бегьер патал цанвай чилерикай рахайтIа, санлай къачурла, ихьтин майданар 3,3 процентдин гегьенш хьанва, техил ва харар цанвай чилерин кьадар — 5 процентдин, картуфар — 0,5 процентдин, алафрин культураяр — 3,6 процентдин гзаф, майвайрик квай чилерин кьадар лагьайтIа, са жизви тIимил хьанва.
«Лезги газет»
