Чи ватанэгьлияр — гьар сана
Чахъ, лезгийрихъ, бажарагълу жегьилар, савадлу пешекарар, кардин гъавурда аваз зегьмет чIугвазвай чешнелу векилар саки виринра ава. ИкI тирвиляй, лезгияр алакьунар авай, чирвилериз майилвалзавай халкь яз машгьурни я. Гьи пеше, гьи хел къачуртIани, къе Россиядин шегьерра чпин тIварар машгьурнавай ватанэгьлияр цIудралди фикирдиз къведа. Гьеле гегьенш къатариз малум тушир алимар, машгьур духтурар, журналистар ва масабурни тIимил авач.
Къенин зи ихтилат Москвада журналиствиле, телеведущийвиле агалкьунралди кIвалахзавай Диана Насировна Юзбеговадикай я. Алакьунри ам неинки Москвада, гьакI Дагъустанда, Азербайжанда авай лезгийризни, масабурузни машгьурнава.
Д. Юзбегова 1989-йисан 1-июлдиз Москвада лезги хизанда дидедиз хьана. Адан диде-буба КцIар райондин Пирал хуьряй я.
Москвадин областдин Одинцово шегьерда 2006-йисуз лицей куьтягьайдалай кьулухъ ам “гьукуматдин управление” пешедай РУДН-дик (Российский университет дружбы народов) экечIна. Телевиденидин, журналистикадин кIвалахдиз итиж ийизвай Дианади гьа са вахтунда Останкинодин телевиденидин школадани кIелна.
Фадлай “Муз-ТВ” телеканалда кIвалахзавай адахъ алай вахтунда журналиствилин, передачаяр тухунин жигьетдай еке тежриба хьанва. Телеканалда ада голливуддин гъетеривай интервьюяр къачузва, тIвар-ван авай ксарикай документрал бинеламиш хьанвай фильмаяр гьазурзава, машгьур ксарин мярекатар, гегьенш концертар тухузва.
Тежрибалувилелди, гурлувилелди мярекатар кьиле тухунай адахъ цIудралди грамотаяр, дипломар, чухсагъулдин чарар ава. Бажарагъ ва кардиз майилвал авайвиляй адахъ амадагрин арада еке гьуьрмет ва нуфуз ава.
Къейд ийиз кIанзава, Урусатда чIехи хьанватIани, Дианадиз лезги чIални чизва. Идалайни гъейри, ада Москвада кьиле физвай лезгийрин медениятдин жуьреба-жуьре мярекатарни кьиле тухузва. Кьилди къачуртIа, Яран сувар, машгьур манидар Жамиля Заловадин ва масабурун концертар ада инсанрин гуьгьуьлар шадардай тегьерда кьиле тухузва. Саки гьар йисуз меркезда тешкилзавай “Лезги дем” кьиле тухузвайдини Д.Юзбегова я.
Хкягъай пешедал кьарувалзавай, кIвалах лезетдиз элкъуьрнавай Дианади акьалтзавай несилриз хъсан насигьатар гузва: “Жуван чIал, ери-бине рикIелай ракъурмир. Гьакъисагъвилелди зегьмет чIугу, садавайни туьгьмет ийиз тежедайвал, уьмуьрда гьамиша адалатлу ва низамлу хьухь. Дарвиле авайбуруз куьмекар гуз алахъ. Вилик еке макьсадар эциг ва абур кьилиз акъуддай рекьер жагъура”.
Диана Юзбеговадин буба военный я, кьилин вад образование къачуна. Алай вахтунда ада банкда, чIехи стхади “BMW” центрада кIвалахзава. Дианадин хизанда са руш чIехи жезва.
Къуй ам кIвалахда ва яратмишунра еке дережайривни кукIушрив агакьрай!
К.Ферзалиев
