ТIебиатдин парк
Акурла тажуб жедай, килигуниз лайих авай чкаяр дуьньяда гзаф ава. Абур вири са гьихьтин ятIани кьетIенвилералди тафаватлу жезва.
Аргентинада авай тIебиатдин Исчигуаласто паркни аламатдин са чка я. Гьакъикъатдани, и еридин тIебиат маса планетадиндаз тешпигь я.
Аргентинадин Сан-Хуан вилаятдик акатзавай Исчигуаласто уьлкведин тIебиат хуьнин къуллугъдин гуьзчивилик ква. ТIебиатдин паркунин мулкариз Вацран дерени лугьузва. Талампая тIвар алай милли паркунин сергьятарни кваз, Исчигуаласто вири дуьньядин ЮНЕСКО-дин ирсинин сиягьдик ква.
ТIебиатдин паркунин майдан 603,7 квадратный километрдикай ибарат я. Са кьадар кул-кусар, кактусар ва гъвечIи тарар экъечIзавай анаг асул гьисабдай адетдин къумлухдиз ухшар я. Гьавадал гьалтайлани, анаг кьурагь чка я.
«Лезги газет»
