Мегьарамдхуьруьн районда, инвестпроектдин сергьятра аваз, емишар хуьдай алай аямдин гьамбарханаяр эцигун гъиле кьадайвал я.
23 -июндиз Мегьарамдхуьруьн райондиз инвестпроект веревирд авун патал делегация атанвай. Муниципалитетдин кьил Фарид Агьмедов делегациядин векилрихъ галаз инвестицияр серф ийизвай майдандал гуьруьшмиш хьана. Инвестордин векил, идалай вилик Дагъустандин хуьруьн майишатдин министрдин заместитель хьайи Шамил Алиев гуьруьшдал Астрахандин машгьур карханадин алай аямдин логистикадин центраяр, емишар ва салан майваяр хуьдай гьамбарханаяр эцигунин рекьяй пешекарар галаз атанвай.
Фарид Агьмедова хуьруьн майишат райондин экономикадин кьилин хилерикай сад тирди къейдна.
Шамил Алиева Мегьарамдхуьруьн районда уьмуьрдиз кечирмишдай и проектдикай ихтилатна. Ада къейд авурвал, и проект республикадин руководстводин Кьиблепатан Дагъустанда емишар ва майваяр хуьдай гьамбарханаяр эцигуниз талукь тапшурмишун кьилиз акъудунин сергьатра аваз кьиле тухузва.
Республикада гьасилзавай хуьруьн майишатдин суьрсетдин 27 процент Мегьарамдхуьруьн райондал гьалтзава ва емишар гьасилунин рекье эхиримжи йисара районди сифте чкаяр кьазва.
Районда 2013-йисуз, Дагъустан Республикада сад лагьайди яз, фад арадал къведай ва виниз тир бегьерлувилин багъ кутунай.
Райондин кьили багълар ва уьзуьмлухар кутунин месэладиз кьетIен фикир гузва.
Шамил Алиева гъавурда турвал, абуру СПОК “Магарамкент” тIвар гун кьетIнавай проект пуд дережада кьилиз акъудда: сифтедай емишар, ахпа майваяр хуьдай чкаяр эцигда, эхирдайни гьасилнавай бегьер санлай маса гудай центр арадал гъида. Инвесторри гьакIни районда фад арадал къведай ва виниз тир бегьерлувилин багълар кутунин месэладик кьил кутун фикирда кьунва. Ихьтин, алай аямдин багъларикай сад гьа ина инвестмайдандин патав кутада.
Проектдин кьетIенвилерикай сад ам я хьи, Мегьарамдхуьруьн районда сифте яз миянардай затIар галачиз чил гьялдай (органическое земледелие) къайда ишлемишда.
“Инвесторри чаз чIехи, гележег авай ва, лагьайтIа жеда, вичиз гьич тешпигь авачир проект теклифнава”, — къейдна Фарид Агьмедова ва инвесторрин, гьакIни Дагъустандин хуьруьн майишатдин министерстводин тIварцIихъ чухсагъулдин гафар лагьана.
“Хуьруьн майишат чи райондин яшайишдинни экономикадин кьилин хел я ва инвесторри и хилера такьатар серф авун неинки са чун, гьакIни инвесторар чеб патални гележег авай кар я”, — къейдна райондин кьили.
И гуьруьшда гьакIни райондин кьилин сад лагьай заместитель Фейруддин Рагьимханова ва хуьруьн майишатдин отделдин начальник Артур Гьажиевани иштиракна.
«Лезги газет»
