Алукьнавай 2018-йисан конкурсрин программадик бязи дегишвилер кутунва.
ИкI, “Лезги газетдин” асул премиядин — Гьажибег Гьажибегован тIварунихъ галай — кьадар гила кьве сеферда артухарзава ва ам 10 агъзур манатдиз барабар жеда.
Кьвед лагьай, яни Мегьамед Гьажиеван тIварунихъ галай премиядин кьадар 5 агъзур манат хьанва.
2018-йис Россияда волонтеррин, яни гуьгьуьллудаказ, чпин хушуналди хъсан крар ийизвабурун Йис яз малумарнава. “…Абуру иеси авачир гьайванар патал приютар тешкилзава, азарханайра ва хосписра авай яшлу ксариз куьмекарзава, квахьнавай ксарихъ йикъаралди-йифералди къекъвез гьазур я. Чпи-чпиз абуру волонтервилин са чIехи хизан лагьай тIвар ганва, вучиз лагьайтIа абур умуми са макьсадди кIватIалзава — инсанриз хушуналди хъсанвилер авуни”, — къейднай РФ-дин Президент В.Путина волонтеррикай рахадайла.
Гьа и фикирдал алаз, яни михьи рикIелди куьмекар гунин, муракабди, четинди тир и девирда патарив гвай ксарин къайгъударвал авунин ва икI мад маса месэлайриз талукь яз, “Лезги газетдин” редакциядини, адет хьанвайвал, конкурс малумарзава. Пуд чкадикай ибарат тир и конкурсдин премийрин кьадар, виликдай хьиз амукьда: 3000, 2000 ва 1000 манат.
Алатай йисара хьиз, гилани чна “ИкIни жеда кьван” — юмординни сатирадин куьруь жанрайрин ва гьакI уьмуьрдин рехнеяр арадай акъудиз куьмек гузвай “Хъсан шикил” конкурсарни давамарзава. И конкурсра гъалиб хьайибуруз гьардаз 1000 манат премия ва дипломар гуда.
Идалайни гъейри, цIийи йисуз чна цIийи конкурсарни малумарзава.
ИкI, алай йисалай гатIунна чна виликдай хьайи “Гьевесламишдай премия” — 1000 манат ва диплом — кардик кухтазва. Амма гила и премия къачунин шартIар дегиш хьанва. Гьевесламишдай премия лезгийрин гьар са райондай са касдивай къачуз жеда. И кар патал герекди анжах хайи газетдин чинал жуьреба-жуьре хци месэлайрай кьил-кьилел алай макъалаяр гъун я.
Мад са конкурс — “Баян галай карикатура” — хци зигьин ва шикилар ядай бажарагъ авай ксариз газетдин чинал чка гун патал малумарзава. И конкурсдин премия 1500 манатдиз барабар я.
“Лезги газетдин” редакцияди жегьил несилар хайи чIалал ва литературадал желбунин ва абурун арада бажарагълубур тайинарунин мураддалди 2018-йисуз цIийи мад пуд конкурс малумарзава:
Сад лагьайди: виридалайни хъсан гьикаядин эсер (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). И конкурсда чпин яшар 40 йисалай виниз туширбурувай иштиракиз жеда.
Кьвед лагьайди: Дагъустандин вузрани колледжра кIелзавай лезги студентрин арада «Виридалайни хъсан очерк» кхьинай (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). Тема ачухди я.
Пуд лагьайди: мектебра кIелзавай аялрин арада “Виридалайни хъсан шиир” кхьинай. Тема ачухди я. И конкурс Етим Эминан юбилейдихъ галаз алакъалуди я.
Конкурсрин гъалибчийрин агалкьунар пулдин премийралди (1-чка — 3000 манат, 2-чка — 2000 манат ва 3-чка — 1000 манат) ва “Лезги газетдин” дипломралди лишанламишда.
РикIел хкин: конкурсдиз ракъурзавай макъалаяр басма авунвай кьуд чарчелай чIехибур хьун лазим туш. Макъалайрин кьилел гьи конкурсдиз ятIа кхьин чарасуз я.
Гьуьрметлу “Лезги газет” кIелзавайбур! Чахъ галаз алакъа хуьзвай, чаз датIана макъалаяр кхьизвай гьар са касдиз мад сеферда чна пара сагърай лугьузва ва сувар мубаракзава! “Лезги газетдихъ” галаз цIийиз таниш хьанвай юлдашриз лагьайтIа, чна хайи газетдихъ галаз сих алакъа хуьниз эвер гузва.
«Лезги газет»
