Къуватдай вегьена

Коронавирусдин тIугъвал себеб яз Москвада кардик кутунвай сергьят эцигнавай серенжемар саки вири къуватдай вегьенва. Идакай “Новости” РИА-ди хабар гузва.

Къейдзавайвал, 13-июлдилай аялрин вири лагерар, машгъулардай маканар, аттракционар ва масабур кIвалахдив эгечI хъувунва.

Нянин мярекатар, дискотекаяр тешкилдай ихтиярарни ганва, амма анра иштиракдайбурун кьадар мумкин тирдан 50 процентдилай артух хьана виже къведач. Гила мектебра, вузра очнидаказ кIелдай мумкинвилерни хьанва. Вири шегьерэгьлийривай чпин офисра кIвалахар давамариз жеда.

1-августдилай кинотеатрар, театрар ва концертрин заларни ахъаюн пландик кутунва, амма абурал гьалтзавай пар мумкин тир 50 процентдилай артух тахьун шартI я. Ачух гьавадал гегьенш къатарин иштираквал авай мярекатар тухунал гьеле къадагъа алама. Дараматра ва улакьра маскаяр алукIунин режимни кардик кума.

Чарабуруз маса гудач

Къазахстандин гьукумдарри къецепатан уьлквейрин агьалийриз чил маса гуник кьил кутунач. Идакай республикадин президент Кьасым-Жомарт Токаева “ktk.kz” чешмедиз малумарна.

“Чна асас месэла тайинарнава. Къецепатан уьлквейрин агьалийриз чил маса гудач. Мад сеферда чун элкъвена и месэладал хкведач”, — атIай гаф лагьана Токаева гьукуматдин гегьенш заседанидал.

Коронавирус

15-июлдин делилралди, дуьньяда коронавирусди начагъарайбурун кьадар 13 323 530-дав агакьнава. Вирусди 578 628 кас кьена. Сагъ хъхьайбурун кьадар 7 399 310-дав агакьнава. ТIугъ­валди дуьньядин 188 уьлкведал гьужумнава.

15-июлдиз Россияда коронавирус акатнавай 6422  кас дуьздал акъудна. Санлай къачурла, чи уьлкведа 746 369  кас начагъар­на. Вирусди кьенвайбурун кьадар 11 770-дав агакьнава, 523 249  кас сагъ хъхьана. Оперативный штабдин делилар “Лента.ру” чешмеди раижна.

Уьлкведал кьару я

Белоруссиядин президент А. Лукашенкоди вичин уьлкве женнетдив гекъигна. Ада къейд авурвал, Белоруссияда тарихда гзаф бедбахтвилериз дурум гайи, амма гьич садрани метIерал акъваз тавур, камаллу ва къудратлу халкь яшамиш жезва. Адан гафар “БЕЛТА” чешмеди раижна.

“За жуван рикI и чилиз, и халкьариз багъишнава”, — уьлкведал кьарувалуналди, лагьана ада.

Вилик пад кьуна

И йикъара САА-ди (Сириядин арабрин армия) Россиядин Хмеймим авиабазадал гьужум авур террористрин объектриз цIай гана. Идакай “AI-Masdar News” чешмеди малумарна. Къейдзавай­вал, Идлиб вилаятдин кьиблепата террористриз акси ягъунар кьадайла, авиациядикайни, артиллериядикайни менфят къачуна. Кьилди къачуртIа, Россияда къадагъа авунвай боевикрин кьве тешкилатдиз ягъунар кьуна.

Чешмедин делилралди, пилот галачир кьве самолет ишлеми­шуналди, боевикриз РФ-дин ВКС-дин базадал гьужум ийиз кIан­завай, амма алахъунар нетижасузбур хьана. САА-ди боевикрин кьве аппаратни тергна.

Мад къалмакъал

Азербайжандин яракьлу къуватри эрменийрин армиядин даях­дин пунктуниз ягъунар кьуна. И делил “Новости” РИА-ди раижна.

Хабар гузвайвал,13-июлдин йифен береда сергьятдал алай гьалар къизгъинбур яз амукьнавай. Идалай вилик Азербайжандин гьукумдарри ислягь уьмуьр кьиле тухузвай инсанар авай хуь­руьз гуьлле гунай Эрменистандик тахсир кутунай. Мадни, Эр­менистандин аскерри Товуз райондин Агдам хуьруьз цIай гана ла­гьай хабарни азербайжанвийри раижна.

Азербайжандин оборонадин министерстводи Эрменистандихъ галаз авай сергьятдал садбуру муькуьбуруз гуьлле гунин агьвалат арадал атайдакай 12-июлдиз малумарна.

Чешмеди алава хъийизвайвал, Эрменистандинни Азербайжандин арада 1992-йисалай къалмакъал ава. Женгер арадал атунин кьилин себебни эрменияр яшамиш жезвай дагълух Къарабахдихъ галаз алакъалу я. Бакудиз къуватдалди Къарабах вахчуз­ кIанзавай, амма алакьнач.

Гьелелиг къарар кьабулнавач

Германиядин гьукуматди ЕС-диз чпихъ галаз санал гьеле июндин сифте кьилера Россиядиз акси санкцияр кардик кутунин теклиф­ ганай. Идакай и йикъара “Deutsche Welle” чешмеди малумарна.

Гуя кибергьужумар кьиле тухузва лугьуз, Москвадик тахсир ку­тазва. Къейдзавайвал, санкцийрин серенжемар кьабулунин па­тахъай теклиф Германиядин парламентдин партийрикай сада гана. Амма санкцияр кардик кутунин гьакъиндай гьелелиг акьал­тIай къарар кьабулнавач.

Немсери 2015-йисуз Германиядин канцлер А.Меркелан электронный почта къайдадикай хкудайбур гуя Россиядин хакерар хьун мумкин я лагьанай.

«Лезги газет»