И йикъара РД-дин Гьукуматдин Председатель Артем Здунован регьбервилик кваз коронавирусдин тIугъвалдин шартIара республикада экономика ва яшайишдин гьалар дурумлудаказ вилик тухуниз талукь яз видеоконференциядин алакъадин куьмекдалди кьиле фейи оперативный штабдин заседанидал кIвалахдай цIийи чкаяр арадал гъуникай ихтилатна. Идакай ТАСС-ди хабар гана.
“Санлай къачурла, и йисуз республикадин муниципальный тешкилатра кIвалахдай 21740 цIийи чка арадал гъун фикирдиз къачунва”, — хабар гана заседанидин вахтунда РД-дин экономикадин ва мулкар вилик тухунин министр Гьажи Султанова.
Министрди алава хъувурвал, алай вахтунда республикада кIвалахдай 6522 чка арадал гъанва. КIвалахдин чкаяр хуьруьн майишатдин, АПК-дин, эцигунрин, алвердин, улакьрин ва образованидин хилериз талукь я.
РД-дин зегьметдин ва яшайишдин жигьетдай вилик финин министрдин сад лагьай заместитель И.Зайналлаева къейд авурвал, къенин юкъуз агьалияр кеспидалди таъминардай центрайри 19 агъзурдалай гзаф ксар кIвалахрал тайинарнава.
Вичин нубатда РД-дин хуьруьн майишатдин ва недай суьрсетдин министр А.Гьуьсейнова рикIел хкайвал, мукьвара эгечIдай салан майваяр кIватI хъувунини инсанар вахтуналди кеспидал машгъулардай чкаяр арадал гъида.
Веревирд авур месэладин нетижаяр кьуналди, РД-дин Гьукуматдин Председатель А.Здунова талукь ведомстводин кьиле авайбурал эцигунрин, туризмдин, шегьерар ва рекьерин майишатар вилик тухунин сергьятра аваз кIвалахдай алава чкаярни арадал гъунин мумкинвилериз килигунин месэла тапшурмишна.
«Лезги газет»
