Эхиримжи са кьадар вахтунда Ахцегь райондин Чеперин хуьре духтур авачир. Арзадилай кьулухъ, 2019-йисуз, Ахцегьай тир жегьил духтур Гьамзебегов Гьамзебег чи хуьруьз рекье туна. Дугъри я, сифте чна, жемятди, духтурвилин тежриба авачир жегьилдивай, паталай къвез-хъфиз, бажагьат медицинадин рекьяй чи рикI динж ийиз жеда лагьана фикирна. Амма чун гъалатI хьана. Къе Гьамзебегалай хуьруьн жемят пара рази я, вирибуру адаз алхишзава. Вири дуьнья коронавирусди къурхулувилик кутунвай девирдин четин шартIара жегьил духтурди вичин пешекарвилин везифаяр лайихлудаказ тамамарзава. Гьамиша чина хъвер авай, мецел ширин келима алай ам йикъан-йикъа гьар са кIвализ къвез, гьар са касдивай сагъламвилин гьал хабар кьаз, иллаки яшлубурунни азарлуйрин дамарра ивидин гьерекат ва температура ахтармишиз, абурун къуллугъда акъвазнава.
КьетIен фикир Гьамзебега хуьруьн михьивилин, инсанри санитариядинни гигиенадин истемишунрал амал авунизни гузва. Азарлуйриз (Аллагьдиз шукур, гила азарлуярни кIвачел ахкьалтнава) вахт-вахтунда капельницаяр кутазвай, дарманар гузвай (хуьре авачир дарман ада вичин машиндаваз фена хкизва) кIвачел кьезил духтур хуьре чаз лап багъриди хьанва.
Чпин хциз ихьтин тербия ганвай диде-бубадиз Чеперин хуьруьн жемятди рикIин сидкьидай пара кьадар сагърай лугьузва. Гележегда Гьамзебегахъ духтурвилин рекьяй еке агалкьунар, чIехи дережаяр жеридахъ чун инанмиш я. Хуьруьн жемятди, гьакI чаз ихьтин хъсан пешекар рекье тур ЦРБ-дин кьилин духтур Митгьедин Мурсаловазни чухсагъул малумарзава.
Чеперин хуьруьн жемятдин тIалабуналди кхьейди Агьмед Ризаев я, зегьметдин ветеран.
