Мегьарамдхуьруьн райондин Билбил-Къазмайрин хуьруьн са куьчедиз Дагъустандин хуьруьн майишат вилик тухуник чIехи пай кутур ДАССР-дин лайихлу агроном Селим Устарович Керимханован тIвар гунин гьакъиндай.
Гьуьрметлу Мегьарамдхуьруьн райондин кьил Фарид Загьидинович!
Малум тирвал, куьне регьбервал гузвай районди Лезгистандиз, санлай къачурла, Дагъларин уьлкведиз цIудралди баркаллу рухваярни рушар багъишна. Адет хьанвайвал, абурун экуь къамат эбеди яз халкьдин рикIера амукьун, акьалтзавай несилриз кьегьалрин баркаллувилер чир хьун, жаванар гьахьтинбурун чешнедаллаз тербияламишун патал куьчеяр, мектебар, маса идараяр халкьдин арада чIехи гьуьрмет къазанмишай векилрин тIварарихъ язава. Ихьтинбурун жергейра ери-бине Билбилрин хуьряй тир Селим Устарович Керимхановни ава.
С.У.Керимханова вичин вири уьмуьр хайи чилиз бахшна. Адан кIвалахдин асул рехъ хуьруьн майишатдихъ галаз алакъалу тир. Дагъустандин хуьруьн майишатдин илимдинни ахтармишунрин институтда кIвалахзавай йисара чи халкьдин кьегьал хци алимрикай ибарат тир десте арадал гъана. Гуьгъуьнлай и дестеди республикадин мулкарал хейлин ахтармишунрин кIвалахар кьиле тухвана, накьвадин менфятлувал гьина хъсан ятIа, винел акъудна. Накьвадин ери чирунин месэлайрай кьетIен алакьунар авай алимдин тIвар неинки са Дагъустанда, гьакIни адалай къецепатани машгьур хьана.
ЧIехи алимдикай “Лезги газетдин” алай йисан мартдин вацра акъатай 11-нумрада макъала ганва. Гьавиляй чун адан уьмуьрдин ва кIвалахдин рекьерикай гегьеншдиз рахадач.
Хайи райондин, республикадин вилик хуьруьн майишатдин илимрин доктор, Вирироссиядин тIебиат хуьнин обществодин Дагъустандин Советдин Президиумдин член, Вирисоюздин накьварин ерилувал ахтармишзавайбурун обществодин Дагъустандин отделенидин председатель хьайи, гьукуматдин кьве медалдинни грамотайрин, СССР-дин ВДНХ-дин буьруьнждин медалдин сагьиб, ДАССР-дин лайихлу агроном Селим Устаровичан лайихлувилер екебур я. И кар фикирда кьуна, чна квез Селим Устарович Керимханован тIвар адан хайи хуьруьн (Билбил-Къазмаяр) са куьчедиз гун теклифзава. И кардин тереф хуьруьн жемятдини хуьзва. Куьнени и кардин тереф хуьдайдак ва Билбил-Къазмайрин хуьруьн са куьчедиз Селим Устаровичан тIвар гунин месэла гъиле кьадайдак умудар кутазва.
Шихсефи Сефиханов,
“Самурэнерго” ООО-дин генеральный директор,
экономикадин илимрин кандидат
