Жаза гудайвал я
США-дин президент Д.Трампа коронавирусдин тIугъвал себеб яз Китайдиз жаза гун хиве кьуна. Адан гафар “Новости” РИА-ди раижна.
Трампан фикирдалди, Китайди вирусдин гьакъиндай виликамаз хабардарнач, месэлаяр чуьнуьхиз алахъна ва и делилдин нетижада 189 уьлкведа тIугъвал чкIана. Ада къейдзавайвал, КНР тамам жавабдарвилиз чIугун герек я.
Коронавирус чукIунихъ галаз алакъалу яз, Трампа Китайдик мартдин вацрани тахсир кутунай. Ада гьисабзавайвал, эгер муькуь уьлквейрин гьукумдарриз вирусдикай са шумуд вацран виликамаз чир хьанайтIа, гьалар хъсан жедай.
Кандидатар хкязава
Белоруссияда президентвиле кандидатар регистрация ийиз гатIуннава. “Интерфакс” чешмеди кхьизвайвал, и гьерекатар 14-июлдалди давам жеда.
Уьлкведин Центризбиркомдиз гьелелиг 7 касди документар къалурнава. Абурун жергеда исятда авай президент А.Лукашенкони ава. Сечкийра Лукашенкодихъ галаз акъажунардай кьилин кандидат Виктор Бабрико яз гьисабзава. Бабрико 19-июндилай СИЗО-да ава. Вишералди миллионар къецепатан уьлквейриз акъудунин макьсаддалди тахсиркарвилерин кIеретI арадал гъунин карда адал шак физва.
Дастин Порьедин инанмишвал
ММА-дай Америкадин машгьур спортсмен Дастин Порьедиз UFC-дин чемпион Гьабиб Нурмегьамедовахъ галаз кьвед лагьай сеферда бягьс тухудай ашкъи ава. Идакай Матч ТВ-ди хабар гана.
Порьедин гафаралди, гьатта чемпионвилин чIул патал тушир бягьс тешкилайтIани, ам гьазур я Гьабибан винел гъалибвал къачуз.
Дастиназ садавайни магълубариз тахьанвай дагъустанви чемпиондин винел гъалибвал къачуз ва и агьвалат тарихда тваз кIанзава. Килигин, ана вуч акъатдатIа.
Коронавирус
8-июлдиз Россияда 6562 касдик коронавирус акатна. И йикъан делилралди, санлай къачурла, тIугъвал пайда хьайи сифтедилай инихъ чи уьлкведа начагъ хьайибурун кьадар 700 792-дав агакьнава. Абурукай 10 667 кас кьена. Сагъар хъувунвайбурун кьадар 472 511-дав агакьнава.
Дуьньяда 11 829 602 кас вирусди азарлу авуна, абурукай 544 163 кьена. Сагъ хъхьанвайбурун кьадар 6 447 656-дав агакьнава. И делилар 8-июлдиз “Лента.ру” чешмеди раижна.
Гьелягьар кьазва
Украинадин ВМС-ди (Военно-морские силы) Россиядихъ галаз гегьенш женгер тухуниз гьазурвал аквазва. “Новости” РИА-ди хабар гузвайвал, идакай флотдин командующий, контр-адмирал А.Неижпапади “Думская” газетдиз гайи интервьюда къейдна.
Адан фикирдалди, Украинадиз Крым къахчуз кIанзава, и кар себеб яз Россиядихъ галаз женгинизни гьазур жезва. Алава хъийизвайвал, женгерин вахтунда гуя зарар, хасаратвилер гзаф жеда лугьуз, гьелягьарни кьазва.
КицIи къутармишна
КIвале цIай кьурла, къуншидин кицIи ана авай инсанар кьиникьикай къутармишиз куьмекна. “I Heart Radio” чешмеди кхьизвайвал, агьвалат Канададин Маркем коммунада кьиле фена.
Йифен сятдин 2-даз кицIи вичин иеси ахварай авудна ва дакIардихъ ялна. И макъамда иесидиз къуншидин кIвале цIай кьунвайди акуна. Агьвалат кьиле фейи чкадал атай къутармишдайбуру ва полициядин къуллугъчийри цIай кьунвай дараматдай буба ва адан руш ахкъудна. Дидедилай ва кьвед лагьай рушалай цIун юкьвай эхкъечIиз алакьна. Амма буба ва муькуь руш кьведни махсус креслойрал алкIанвай набутар тир, гьавиляй кузвай дараматдай масадан куьмек галачиз эхкъечIиз жезвачир.
Хъсан алакъаяр
Стратегиядин хатасузвилерин месэлайрай Китайдинни Россиядин арада лахъ хъсан рафтарвилер ава, уьлквейри датIана алакъа хуьзва. “Новости” РИА-ди раижзавайвал, Китайдин МИД-дин яракьрал гуьзчивал тухунин департаментдин кьил Фу Цуна и жуьреда уьлквейрин арада авай хъсан алакъайрин тарифна.
Адан гафаралди, кьве уьлкведи нетижалувилелди алакъаяр хуьзва. Ада вич мукьвара Пекинда авай Россиядин дипломатиядин чIехи къуллугъчийрихъ галаз гуьруьшмиш жедайдакай, гьакIни Россиядин МИД-дин кьилин заместитель С.Рябковахъ галазни датIана алакъадал алайдакай ихтилатна. Абуру яракьрал ва Ирандин ядерный технологийрал гуьзчивал тухузва.
Шоколаддик квай хийир
Недай затIарин кьадарар тайинардай пешекар В. Зародинади шоколаддин менфятлувиликай ихтилатна, хабар гузва “Лента. ру” чешмеди. Адан фикирдалди, шоколад антиоксидантралди гзаф девлетлу я. Пешекарди къейднавайвал, шоколадди инсандин иммунитетдиз хъсан таъсирзава. Зародинади кудай шоколад теклифзава, гьикI хьи, адак хийирлу затIар гзаф ква.
Къейд ийин, 2018-йисуз Америкадин алимри гьар юкъуз тIимил-тIимил шоколад ишлемишуни вилерин экв хъсанарда лагьанай.
«Лезги газет»
