Эхиримжи йисара гзаф манидарриз манияр лугьудайла фонограммадикай хийир къачун деб хьанва. Кьилди къачуртIа, Дагъустанда кьиле физвай саки вири концертра асирдин и цIийивиликай гегьеншдиз менфят къачузва. Гьатта бязибуру хуьрера, шегьерра мехъеррални кваз фонограммадикай даях кьазва. Са гафуналди, манидардин халис ван къвезвай, чан алай манияр тамамарзавай мярекатар чи йикъара кьерицIаруз дуьшуьш жезва. Гьа ихьтинбурукай сад мукьвара Дербент шегьерда «Руьгьдин авазар» лишандик кваз кьиле фена. Лезги манидин и межлис тешкилайди чи халкьдин рикI алай манидаррикай сад тир РД-дин искусствойрин лайихлу деятель Даниял Къазиев я.
Межлис, са шакни алачиз, лезги культурадин уьмуьрда лишанлу вакъиадиз элкъвена. ИкI тирди мярекатдал рахай хейлин мугьманри тестикьарна. Кьилди къачуртIа, абурун жергеда Дагъустандин халкьдин артистар – Тарлан Мамедовни Исамудин Агьмедов, манидарар Керим Камилов, Сейранат Наджафова, ашукь Айдин, музыкантар Мамедали Агъабалаев, Надир Тагьиров, Къазибег Тагьиров ва масабур авай.
Мярекат ачухдайла Даниял Къазиева къейд авурвал, лезги манидин «Руьгьдин авазар» программа гегьеншди я ва ихьтин лишандик кваз межлисар идалай кьулухъни тешкилда.
— «Руьгьдин авазар» программадин кьилин макьсадрик лезги мани хуьн, медениятдин майданда пайда жезвай жегьил къуватриз куьмекар гун, лезги мани къецепатан халкьарин медениятдин таъсирдикай хуьн ва масабур акатзава, — лагьана Д.Къазиева. – Чна чи милливал, кьетIенвал, лезги манидин гьайбат хвена кIанда. Маса халкьарин гьавайриз са манани авачир чIалар кхьиз арадал гъизвай манийрал эхир эцигдай вахт атанва. Эгер чна къе и кардин вилик пад кьун тавуртIа, гележегда гьалар мадни пайгардикай хкатда. Чал халкьдин манияр гьихьтин гьалда аваз агакьнатIа, гьа къайдада чна абур къвезмай несилрални агакьарун лазим я. И буржи тамамарун патал за квез виридаз сад хьуниз эвер гузва, — алава хъувуна Д.Къазиева.
Гуьгъуьнлай майдан манидаринни музыкантрин ихтиярда туна. Межлис Мирвет Милахимова тамамарай «Дилбер» маниди ачухна. Ахпа сад-садан гуьгъуьналлаз сегьнедиз «Гъетерин Дагъустан», Дербент ВИА-яр, Тарлан Мамедов, кларнетист Алимирзе Сулейманов, чIагъанчи Надир Тагьиров, Сейранат Наджафова, Мамедали Агъабалаев, Даниял Къазиев, гитарист Къазибег Тагьиров ва хейлин масабур экъечIна. Абуру анжах чпин алакьунрикайни бажарагъдикай даях кьуна манияр тамамарна, алатрал къугъвана.
Агьмед Магьмудов
