Аллагьдиз гьар са карда михьивал кIанда. Неинки са беден, алай парталар, гьакIни ниятарни фикирар, гафарни ийизвай крар михьибур хьун лазим я. Винелпатан ва руьгьдин михьивал сад-садахъ галаз алакъалу я. Гьавиляй руьгьдин жигьетдай еримлу хьунихъ майилвалзавай инсанди кпIун вилик ийизвай дастамаздиз кьетIен фикир гана кIанда. Дастамаз – кпIунин, капIни женнетдин куьлег я.
Дастамаздин лайихлувилерикай чаз Мугьаммад Пайгъамбардин (с.а.с.) хейлин гьадисрай хабар жезва.
Сад лагьайди, дастамаз себеб яз малаикди Аллагьдивай инсандиз гунагьар багъишун тIалабзава. Ибн Умаралай (къуй вичелай Аллагь рази хьурай) агакьнавайвал, Пайгъамбарди лагьана: «Йифиз дастамаз гваз ксузвай инсандин къвалав малаикди йиф акъудзава ва гьар сеферда и инсан ахварикай кватайла, малаикди чарасуз лугьузва: «Я Аллагь, Ви флан лукIраз гунагьар багъиша, гьикI лагьайтIа ам дастамаз гваз ксана».
Кьвед лагьайди, дастамаз себеб яз женнетдин рехъ ачух жезва. Укбат Ибн Амира (къуй вичелай Аллагь рази хьурай) хабар гузвайвал, адаз Пайгъамбарди икI лугьудайла ван хьана: «Гьи инсанди виридалайни хъсандиз дастамаз къачуна рикIин сидкьидай кьве ракаатдикай ибарат капI ийизватIа, ам, шаксуз, женнетдиз лайихлу я».
Пуд лагьайди, дастамазди инсан гунагьрикай магьрумзава. Усмана (къуй вичелай Аллагь рази хьурай) азадай лукI Хумрана лагьанва: «Усман Ибн Аффан мискIиндин патав акъвазнавайла адан патав рагъдандин кпIунилай кьулухъ азан гудайди атана ва дастамаз къачун патал яд тIалабна. Дастамаз къачурдалай кьулухъ ада лагьана: «Аллагьдал кьин кьазва за квез са гьадис ахъайда. Эгер Аллагьдин Ктабда аят авачитIа, ам за квез ачухдачир. Заз Мугьаммад Пайгъамбарди (с.а.с.) икI лугьудайла ван атана: «Эгер мусурманди виридалайни хъсандиз дастамаз къачуна капI авуртIа, Аллагьди адаз и ва гуьгъуьнлай къвезвай кпIунин арада авур вири гунагьар багъишда».
Кьуд лагьайди, дастамаз себеб яз Къияматдин юкъуз мусурманрин чинри нур гуда. Абу Хурайради (къуй вичелай Аллагь рази хьурай) вичиз Аллагьдин Пайгъамбарди икI лугьудайла ван атаналда: «Гьакъикъатдани, Къияматдин юкъуз зи тайифадай тирбурув «гуран мухаджжалина» (чинрал нур гузвай лацу лекеяр ва гъилерални кIвачерал лацу уьнуьгар алайбур) лугьуз рахада. Бедендин и чкайри, дастамаз къачудайла амукьнавай гелер себеб яз, нур гуда. Низ вичин экв артухариз кIанзаватIа, къуй гьада и кIвалах авурай». (Бухари).
Вад лагьайди, дастамазди Аллагьдин патай авай гьакъи (вознаграждение) артухарзава. Абдуллагь Ибн Умара (къуй вичелай Аллагь рази хьурай) агакьарнавайвал, Пайгъамбарди лагьаналда: «Дастамаз гваз-гваз мад сеферда дастамаз хъувурдан тIварцIихъ Аллагьди хъсан цIуд кIвалах кхьида». (Тирмизи).
Гьар са мусурмандиз дастамаздихъ авай гьунарар чир хьана кIанда. И месэладин гъавурда хъсандиз авай инсанди вич дастмаздикай авай хийирдикай магьрумдач.
«islamdag.ru» сайтдай
