Дагъустандин образованидин ва илимдин виликан министр Шагьабас Шагьоваз кьуд йисни зур кар гана ва 20 миллион манатдин кьадарда авай жермени тайинарна. Идакай ТАСС-ди хабар гузва.
Москвадин Лефортово райондин судди Ш.Шагьов еке кьадарда аваз ришвет къачунай ва бюджетдин такьатар харж авунай тахсиркар яз гьисабна.
Журналистриз Москвадин прокуратурадай хабар гайивал, судди 2013-йисан декабрдин вацра, Шагьабас Шагьова, республикадин образованидин ва илимдин министрдин къуллугъдал алаз, РД-дин “Дирекция государственного заказчика-застройщика” КП-дин директордивай ришвет яз “ROM” фирмадин, вичин къимет 293 агъзур манатдилай гзаф тир диван къачурди тайинарна. Бюджетдин такьатар харж авуникай рахайтIа, Шагьован рушан “Логос” центрадин ирид къуллугъчи (центр гьатта талукь тир къурулушра регистрацияни авунвачир) илимдинни технический яратмишунрин рекьяй республикадин центрадин (РЦНТТУ) къуллугъчияр яз къалурнавай. Къанунсуз гьерекатрин нетижада 2016-йисан августдилай 2017-йисан сентябрдалди абуруз 779 агъзур манатдин кьадарда аваз бюджетдин пуларин гьисабдай мажибар гана.
И эпизоддай виликан министрдин руш Амина Шагьовадиз шартIуналди — 3, “Логос” центрадин виликан управляющий Мурад Абдурагьмановаз — 2,5, РЦНТТУ-дин виликан директор Марат Алиеваз 2 йис кар гана.
«Лезги газет»
