Селим Аллагьяров Александр Градскийдин гуьзчивилик кваз ва тамашачийрин куьмекдалди 1-каналдин “Голос” телешоу-конкурсдин финалдиз акъатунин вакъиади чак шадвал кутунва. Ада чи халкь, вири дагъустанвияр дуньядиз машгьурзава. Финалдиз экъечIдай паюна Селима нубатдин сеферда вири гьейранарна, аферин! Селим “Голос” проектда иштиракзавай сад лагьай дагъустанви я. Ша чнани, СМС-дин къайдада сесер гуналди и кардик къуьн кутан.
Лезги халкьдин музыкадин искусстводин алемдиз Селим Аллагьяров хьтин бажарагъ, гьелбетда, буш чкадал арадал атанач. РСФСР-дин халкьдин артист, вичиз гьахълудаказ “Лезги билбил” лугьузвай Рагьимат Гьажиевадин, РД-дин культурадин лайихлу деятель Хийирбег Асланбегован, республикадин лайихлу артист Тарлан Мамедован ва гзаф маса устадрин баркаван чилел, гьабурун рехъ-кар давамарун, хайи халкьдин таъсиб хуьн яз экъечIнава ам виридуьньядин майдандиз. Эхь, чаз Селим хьтин бажарагълу халис устадар тIимил ава, гьавиляй адаз музыкдин искусстводин рекьин кукIушдиз хкаж хьуниз куьмекна кIанда.
Манидар, адан диде-буба, иллаки рагьметлу баде, чIехи буба хъсандиз чидайвиляй ва жегьил бажарагъдин агалкьунризни устадвилин рекьиз итиж ийизвайвиляй бажарагълу жегьилдин уьмуьрдинни яратмишунин рекьикай са кьадар гегьеншдиз рахан. Советрин девирда лезги жегьил хизан Чечен Республикадин Грозный шегьерда яшамиш жезвай (кьакIиви Азиз Селимович шегьердин больницадин хирург, ахцегьви Мая Асимовна — педучилищеда музыкадин тарсар гузвай муаллим). Селимни абуруз 1987-йисуз гьана хьана. Ял ядай йикъара хизан, адет яз, яшлу диде-бубадал кьил чIугваз Къизлярдиз хкведай. Гуьгъуьнай Чечняда дяведин вакъиаяр себеб яз абур Дербентдиз куьч хьана.
Рагьимханов Асим Абакаровича — Ватандин ЧIехи дяведин вахтунда духтур яз, Берлиндиз кьван фена хтай, ахпа 50 йисуз Къизляр райондин больницада духтур хьайи (саки 40 йисуз — кьилин духтур) къени къилихрин халис инсанди, вини дережадин пешекарди ва зурба общественникди — халкьдин арада лайихлу гьуьрмет къазанмишнавай. Милли мани макьамдални рикI алай ада 1948-йисуз Берлиндай аккордеон хкана. КIвале гьакI балалайка, пианино авай ва хайи хуьруьхъ, дагъларихъ цIигел, рикI дарих хьайила, ада абур рахурдай. Пуд-кьуд йисавай хциз, кIаник хъуьцуьганар кваз пианинодихъ ацукьарна, дидеди сабурлувилелди нотаяр чирзавай шикил зи вилерикай карагзава. ИкI, аялдиз музыкадихъ авай гьевес диде-бубадиз гьеле адан 5 йисни тахьанмаз ачух хьана ва абуру и кардиз майилвална.
— Аялди гьатта классикадин авазарни кваз рикIивай гьиссун ва адан михьи сес акурла, за адахъ галаз яваш-яваш кIвалахиз, репертуар заланариз башламишна. Зи тарсар ада лезетдивди кьазвай. Ахпа масадаз такун патал мукьвал-мукьвал кIвалин гьамамда-хелвет чкада кьилди жез, ада манияр лугьуз хьана,- лугьузва Селиман диде ва адан сифте муаллим Мая Асимовнади.
Дербентда 3-нумрадин школадин 5-классдиз акъатайла, Селим шегьердин музшколада гитарадин ва пианинодин классрик кутазва. Сифте йикъалай ада кьетIен зигьиндалди, музыка гьиссунин бажарагъдалди ва аялдиз хас тушир ажайиб гуьзел, михьи сесиналди муаллимар гьейранарзава. Сифте яз халкьдин вилик Селим Аллагьяров Дербентда Яран суварик “Аршин-мал-алан” къемедадай ария тамамариз экъечIна. Ахпа Аялринни жегьилрин дворецда кьиле тухвай жегьил бажарагърин “Билбил” конкурсда (1997-йис), Махачкъалада “Перепёлочка”, “Марьяна”, “Таланты ХХI века” фестивалра (1998-2000 йисар) жегьил артистди урус, неополитанский ва дуьньядин музклассикадин манияр тамамаруналди гъалибвилин са жерге призарни дипломар, тамашачийрин патай кIанивал къазанмишна.
Гьа макъамда за жегьил бажарагъдикай республикадин “Лезги газетда” сифте макъала кхьидайла, Дербентда Асим Абакаровича суьгьбетнай: “Селимаз музыкадин тIебии бажарагъ хьун дуьшуьшдин кар туш, гьикI хьи, яргъал баде жезвай Рагьимат Гьажиевадилай башламишна, дидедин патай адан саки вири мукьва-кьилияр музыкадал рикI алайбур я. Кьилинди, аялдиз гъвечIи чIавалай са кардиз авай майилвал акуна, абур ачухариз куьмекун я. И карни чна ийизва”.
Музшколадин муаллимрин теклифдалди, Дербент шегьердин администрациядин спонсорвилин ва аялдин алакьунар акур Мурад Кажлаеван тавакъудин чарчин куьмекдалди 1999-йисуз 5-классда кIелзавай гада, махсус имтигьанрай агалкьунралди экъечIуналди, Москвада Россиядин хордин искусстводин Академиядик квай Александр Свешникован тIварунихъ галай хордин училищедик (гила и училище вичин бине эцигайди тир Виктор Попован тIварунихъ гала) экечIна ва ана Вирироссиядин ТВ-дин аялрин хордин регьбер, кьилин режиссёр В.С.Попован гъилик чирвилер къачуз хьана. КIелай кьве вацралай, кесибвилин шартIар себеб яз, Селим кIвализ хтуниз мажбур хьана. ГъвечIи дуллухдал алай интеллигент хизандиз хцив Москвада кIелиз тадай мумкинвал хьанач. И кардин гьакъиндай ингье РФ-дин культурадин министерстводин хордин Академиядин ректор, Россиядин лайихлу артист, профессор В.П.Стародубровскийди 1999-йисан октябрдиз С.Аллагьяроваз ганвай характеристикада вуч кхьенватIа: “…Селим Аллагьярова музыкадин рекьяй вичиз лап зурба зигьин, алакьунар авайди къалурна. Гададиз лап хъсан сес ва музыка тамамарунин тIебии устадвал ава. И карди адаз гьам махсус предметар (хор, вокал, фортепиано, сольфеджио, музграмота), гьам школадин умуми чирвилерин дисциплинаяр агалкьунралди чирдай мумкинвал гузва. …Бажарагълу жавандиз Москвадин А.В.Свешникован тIварунихъ галай училищеда кIелдай мумкинвал гун патал адаз спонсорвилин куьмек жагъурун чна кIевелай тавакъу ийизва”.
Элкъвена хъфидай мумкинвал тахьана, Селим Дербентдин музучилищеда вичин муаллимар тир Виктор Ивановичан ва Татьяна Агьмедовнадин гъилик эхкечIна. Дугъри я, Азербайжанда Дагъустан Республикадин векил М.С.Къурбанов арада аваз Азербайжанда Италиядин посол Маргарита Костади бажарагълу гададиз Италияда Лучано Павароттидин школада кIелун теклифна. Гьелбетда, им Селиман кьисмет гьялзавай хьтин адан эрзиман мурад тир. Амма вилик Азербайжандин гражданство кьабулунин шартI эцигнаваз акурла, 9 йисавай гада рази хьанач.
Лугьун хьи, гьар жуьре рекьерай зигьинлу аяларни бажарагълу жегьилар чаз пара ава. Амма яшайишдин къулайсузвилин, диде-бубадин къайгъударвал тахьунин, уьмуьрда хъсан муаллимарни къаюмвалдай ксар гьалт тавунин себебрикди абурун бажарагъ ачух жезвач. И жигьетдай Селиман бахтуни гъана. Эвелимжи нубатда диде-бубадин ва гададин вичин алакьунарни къастунал кIевивал себеб яз ам руьгьламишдай, кIелдай мумкинвал гудай, гъил кьадай ватанперес ксар пайда хьана. Иллаки 12 йисаваз Ахцегьа “Шарвили” эпосдин суварик итальян чIалал классикадин ва лезги чIалал композитор Мегьамед Гьуьсейнован “Дидедикай мани” тамамарна, дипломарни пишкешар къазанмишайдалай ва ада манияр лугьузвайвал республикадин телеканалрай къалурайдалай кьулухъ Селиман машгьурвал мадни артух хьана. Гележег авай гададин бажарагъдиз РФ-дин искусствойрин лайихлу деятелар — композиторар тир Мурад Кажлаева, Мегьамед Гьуьсейнова, Ширвани Чалаева, РД-дин халкьдин артист Хан Баширова, Махачкъала шегьердин культурадин управленидин начальник Наида Абдулгьамидовади, РД-дин композиторрин Союздин председатель Р.Фаталиева ва масабуру дикъет гана, ам чпин къаюмвилик кутуна. Кьилди къачуртIа, Имам Яралиева Аллагьяроврин хизан Дербентдай Махачкъаладиз хкана, Селиман диде-буба кIвалахралди таъминарна ва вичизни Готфрид Гьасанован тIварунихъ галай музучилищеда лап хъсан педагогрин гъилик кIелдай мумкинвал гана. 2006-йисуз жегьил манидарди Санкт-Петербургда вокалистрин А.Рубинштейнан тIварунихъ галай Международный конкурсдин 1- премия къачуна ва икI мад.
Махачкъаладин музучилище агалкьунралди куьтягьай Селим Азизович мад Москвадиз фена, музыкадин рекьяй дуьньяда лап машгьурбурукай тир Гнесинрин тIварунихъ галай Академиядик экечIна. Дикъет це садра, кьабулзавай 10 касдин чкадал документар вуганвай 800 жегьилдикай анжах са Селима “5” къачуна, ам академической пение факультетдин студентвиле кьабулна. Гьа макъамда кьабулдай комиссиядин членрикай сада къейд авурвал, гьакъикъатдани, Селим хьтин кьетIен бажарагъдин инсанар 100 йисалай садра ва я миллиондикай сад майдандиз акъатзава. Пешекарри къейдзавайвал, Селимаз лирикадинни-драмадин баритондин надир сес ава ва ам “Гнесинкадин” академпениядин факультетдик экечIай сад лагьай дагъустанви я. Гьавиляй Академиядин хордин искусстводин профессор Дмитрий Вдовина ам вичин гъилик кутун ва адан алакьунар, чирвилер ахтармишун (стажировкани) машгьур устадар тир Александр Ведерниковални Сергей Москальковал тапшурмишун дуьшуьшдин кар туш. Москвада кIелиз хьайи вири вахтунда Селим Аллагьяров Лезгийрин федеральный милли культурадин автономиядин (ФЛНКА) регьбер Ариф Керимован къаюмвилик хьана ва гилани адал гуьзчивалзава.
Селиман рикI алай манидарар дуьньяда машгьур Тананьо, Мазини, Карузо, Муслим Магомаев хьтин устадар я ва гьабурулай ада чешнени къачузва. Гьавиляй “Голос” телешоудани Селима М.Магомаеван репертуардай “Чёртово колесо”, “Ты три года мне снилась” манияр лагьана. “Браво, Селим! С закрытыми глазами казалось, что Муслим Магомаев вернулся”,- ванер акъатна залдай гьейран хьанвай тамашачийрай.
Алай вахтунда, гатун юкъуз марфадилай кьулухъ къарникъузар хьиз, гзаф пайда хьанвай эстрададин къалп гъетерин арада Селим Алагьярован сес, лугьун хьи, чаз “мичIи пачагьлугъда экуьнин нур” хьиз я. Парабурулай тафаватлу яз, гьакъикъатдани, Селимаз “музыкадин нурлу гъед” лугьуз жеда.
Зурба манидар хьиз, Селим Аллагьяров хъсан общественник, тешкилатчини я. И рекьяй адан алакьунар иллаки эхиримжи йисара мергьяматлувилин “Просвещение” фондунин (Президент, РД-дин лайихлу муаллим Магьмуд Абдулкеримов) куьмекдалди кьиле тухузвай республикадин “Лезги сес” фестиваль-конкурсдин кIвалахда раиж хьана. Адан мурад лезги манини дуьньядин классикадин дережадиз хкажун я.
Эхирдай къейдин, бажарагълу манидар Селим Аллагьярован республикада музыкадин искусство вилик тухунин гьакъисагъ зегьмет бажарагълу манидар 2015-йисуз Москвада Дагъустандин культурадин Центради “Дагъустандиз вафалувиляй” медаль гуналди къейдна, 2017-йисуз адаз “Дагъустан Республикадин лайихлу артист”лагьай гьуьрметдин тIвар гана. Къуй ваз чандин сагъвал, хизанда хушбахтвал ва ви пешекарвилин дережаяр мадни вини дережадиз хкаж хьурай!
Дашдемир Шерифалиев