Мукьвара чав Санкт-Петербургдай рикI тIардай хабар агакьна: 83 йисан яш­да аваз машгьур алим, философиядин илимрин доктор Жамал Зейнудинович МутIагьиров рагьметдиз фена.

Ж.З.МутIагьиров 1937-йисан 10-декабрдиз Кьурагь райондин Ашахуьре дидедиз хьана. ДГУ-дин тарихдин факультет акьалтIарайдалай кьулухъ Ленин­граддин госуниверситетдин (ЛГУ) тарихдин факультетда аспирантурадик экечI­на. 1962-йисуз илимрин кандидатвилин диссертация хвена.

1964-йисуз жегьил алим МутIагьиров ЛГУ-дин философиядин факультетдин ассистент яз тайинарна. Пуд йис арадай фейила чи ватанэгьлидиз доцентдин тIвар гана.

Гуьгъуьнлай кьисметди Жамал Му­тIагьиров чIехи уьлкведин а кьилиз акъудна: ада Дальневосточный университетда ва Камчаткадин педагогвилин институтда кIвалахна.

Вири и йисара бажарагълу жегьил пешекар илимдал машгъул жезвай. 1973-йисуз ада жемиятдин яшайишдин къурулушдин месэлайрай илимрин докторвилин диссертация хвена. 1974-йисуз чи баркаллу ватанэгьлидикай профессор хьана.

Уьлкведин кеферпатан меркездиз хтайла, МутIагьиров, конкурсдин бинедаллаз, илимдин коммунизмдин кафедрадиз акъатна. Гьа чIавалай адан педагогвилин ва илимдин рехъ философиядин факультетдихъ галаз алакъалу хьана­.

ЛГУ-да кIвалахзавай йисара чи баркаллу ватанэгьли Берлиндин, Будапештдин Лейпцигдин университетриз фена, къецепатан уьлквейрин вузрин студентриз лекцияр кIелна. 1974-1976-йисара ам Кубада яшамиш хьана. Ина профессор МутIагьирова Гаванский университетда ва муаллимар гьазурдай Милли цен­трада профессор-консультант яз кIва­­лахна. Идалай гъейри, ам мукьвал-мукьвал Бразилиядиз, Аргентинадиз, Мексикадиз илимдин командировкайриз физвай.

1990-йисарин эвел кьилера философиядин факультетда илимдин коммунизмдин кафедра цIийи хъувуна ва “Политология” хел арадал гъана. 2001-йисуз международный сиясатдин вакъиайрин кафедра тешкилна ва ина профессор МутIагьирова Латиндин Америкадиз талукь лекцияр кIелна.

Лагьана кIанда, ашахуьруьнви алим хъсандиз международный сиясатдин месэлайрин гъавурда авай пешекар тир. Адаз РФ-дин Федерациядин Советдиз и рекьяй эксперт яз теклифзавай.

Алимдин къелемдикай цIудралди монографияр, юридический вузар патал учебникар, вишералди илимдин макъалаяр хкатнава. Адан регьбервилик кваз илимдин 60 кандидатвилин, 6 докторвилин диссертацияр хвена.

Яргъал йисара илимдин хиле намуслувилелди зегьмет чIугунай Жамал Зейнудинович Санкт-Петербургдин университетдин “Педагогвилин устадвиляй”, философрин жемиятдин “Вторая навигация” премийриз, “РФ-дин Высший школадин лайихлу къуллугъчи”, “СССР-дин Высший школадин отличник”, “Пешекарвилин кьилин образованидин гьуьрметлу къуллугъчи” тIварариз лайихлу хьана. Ам дибдин “Демократия как универсальная ценность” тIвар ганвай кIвалах­дин автор тир.

Дагъустан Республикадин Санкт-Петербургда авай Векилханадин пресс-къуллугъдин регьбер Низамидин Къаинбегова къейд авурвал, уьлкведин кеферпатан меркезда авай лезгийри еке магьрумвал гьисснава. Адан гафаралди­, Жамал Зейнудинович дуьньядин де­режадин алим тир, профессордиз гьам чи, гьамни къецепатан уьлквейрин алимрин арада еке гьуьрмет ва кесер авай.

“Лезги газетдин” редакциядин коллективди Жамал Зейнудиновичан хизанриз, вири мукьва-кьилийриз башсагълугъвал гузва. ЧIехи алимдиз Аллагьди рагьметар, багърийрин рикIериз сабур гурай.